《Call of Duty: Modern Warfare》系列每集嘅故事劇情都係重點所在，而我地一眾 Fans 等咗好耐終於有新一代嘅《COD: MW》，新劇情自然係焦點所在。最近 PlayStation Blog 就訪問咗二位負責今集劇情嘅重要人物 Taylor Kurosaki 及 Jacob Minkoff，帶出重要嘅訊息。

訪問入面，擔任 Studio Narrative Director 嘅 Taylor Kurosaki 透露，遊戲前期將會有一個任務，內容係玩家要攔截一個涉嫌曾參與倫敦毀滅性恐怖襲擊嘅團體。而 Infinity Ward 今次嘅目標係希望創造一個富真實性嘅嚴肅故事，希望玩家去思考「戰爭」呢個咁敏感嘅主題，所以今次嘅劇情同以往系列相比，「對」、「錯」嘅界線更模糊，道德上嘅位置更難拿捏，而呢點係會令玩家感覺並不舒服，令玩家去反思自己嘅道德觀念。

Kurosaki 亦有提到，佢地無依賴任何人，同時亦都無任何限制。佢地批評超級大國，批評呢啲大國喺衝突地區作戰係點樣作戰，所以今次作品係非常之嚴肅的。

為咗令遊戲更真實，佢地仲有同 SAS、CIA 同海豹部隊嘅退伍軍人做咗一系列詳細嘅研究，例如向佢地教授現實中部隊行動模式，即係點樣清理樓梯、點樣破門等等戰術。因為 IW 意識到需要以崇敬及尊重態度去對待今次嘅主題。

而道德界線呢樣野往往係好引人入勝，由經典嘅電車難題*，到近日香港所發生一連串事件。有人覺得示威者好暴力，有人覺得其實無乜野，嘗試拋開政治嘅立場，以最純粹嘅道德觀念，設身處地去思考一下，相信你會搵到答案。

《Call of Duty: Modern Warfare》將於今年 10 月 25 日發售，對應平台為  PS4 / Xbox One / PC。

*（即係假設你看到一輛煞車壞了的有軌電車，即將撞上前方軌道上的五個人，而旁邊的備用軌道上只有一個人，如果你什麼都不做，五個人會被撞死。你手邊有一個按鈕，按下按鈕，車會駛入備用軌道，只撞死一個人。你是否應該犧牲這一個人的生命而拯救另外五個人？）