LEGO 75810 The Upside Down 呢套以《Stranger Things 怪奇物語》做主題嘅產品，好多睇過《怪奇物語》嘅朋友對呢 Set 興趣就一定大啦！不過玩過之後你會發現原來唔係咁簡單，75810 The Upside Down 係仲有好多可塑性喺當中，不過依家同大家開箱睇睇75810 The Upside Down 原本嘅吸引力先！

75810 The Upside Down – 2287 件

宣傳嘅時候大家都知，75810 The Upside Down 嘅包裝都可以玩埋 Upside Down 啦！

一開盒見到盒中有盒？！

總共 11 個部份，製作書都分現實、顛倒世界兩本

兩張貼紙其實可以話係一模一樣，只係現實、顛倒世界嘅用色分別

成盒 75810 The Upside Down 可以分開警車、現實、顛倒世界同樹幹四部份，不過製作過程上就冇乜好特別嘅用件技巧，但屋內部份傢具、裝修都有小驚喜！

平時用嘅 Minifigure 櫈仔可以加件變成梳化

用另外 4 件組件，又可以變社區會堂啲膠櫈

門框櫃可以咁樣砌

呢個韆鞦真係啱晒遊樂場主題愛好者偷師

貼紙今次只係輔助，其他內裝都不過不失啦！

劇中最重要一場，被困顛倒世界中嘅 Will 向媽媽 Joyce Byers 靠電燈飾通訊而閃出 “R” “U” “N”一幕，75810 The Upside Down 亦用燈件做返呢幕情節出嚟，呢個效果全靠一件印刷組件去做到

閣樓雖然有啲 Detail 位，可惜要拆開個屋頂先可以清楚見到

未上樹幹部份前，再睇睇現實、顛倒世界兩部份對比

做少少改裝，似乎做得返娃娃屋式格局

反而顛倒世界屋內裝置大致同現實部份一樣，但係屋嘅四周都有組件扮返樹藤滿佈吓感覺，加埋唔少透明件去扮不知明液體，成個陰深感出晒嚟！

另外如果你想砌好晒先考慮拆返樹幹部份分返開兩間屋的話，敬請千萬小心，因為為左成個結構穩固，佢兩支樹幹同屋部份連接位置係以四個 Ball Joint去緊扣，絕對唔係輕易拆得返開，所以如果係想分開擺放嘅朋友記得留意呢點！

講完場景就到 Jim Hopper 同佢嘅警車，外觀細節充足，但架車就預左唔會比大家放 Minifigure 落去架啦，皆因司機位係冇 Studs 去扣實 Minifigure，一 Upside Down就會成個 Minifigure 黐住車頂(笑)

冇 Studs 嘅原因就係為左呢個窿！

配合現實部份一個支架位置

咁就可以反轉嘅時候都唔會跌落嚟

最後睇埋所有 Minifigures ，先睇 5 個細路

Eleven 係令 Fans 最失望，一來冇 Skinhead，二來著左裙之後佢嘅活動短腳變左冇得活動。

好彩仲有個窩夫！

另外四個細路 Mike 、Dustin、Lucas 同Will，拎埋屋中嘅扮 Boardgame 件，咁就可以做返開場佢地玩 Boardgame 嘅情節

睇埋 3 個成人 Size Minifigures

Joyce Byers有雙表情之外，特別留意異世界怪物 Demogorgon 嘅腳係繼 2016 年第 15 代 Minifigure 中嘅農牧神 (Faun)後再次見到同一模製嘅特別腳

總結

製作前同大家講過點解 75810 The Upside Down 唔只《怪奇物語》 Fans 啱玩，仲有好多可塑性。原因首先係 75810 The Upside Down 原設定係 Byers 家嘅小屋。而呢間小屋喺劇中係模仿歐美好多經典恐怖電影，以林中小屋(Cabin in the wood)去作為場景呢一點都作致敬。所以如果係歐美恐怖電影愛好者，呢盒 75810 The Upside Down 其實都好啱你心水！

75810 The Upside Down