唔知在座有幾多朋友鍾意玩恐怖遊戲？獨立遊戲工作室 Cracked Heads Games 就為大家帶黎全新遊戲《Silver Chains》，對應平台為 Steam、PS4、Switch 及 Xbox，其將於 8 月 6 日先行於 Steam 平台發售，而其他平台將於 2019 年冬季上架。

《Silver Chains》係一隻第一視點精神恐怖遊戲，舞台設於英格蘭一間大宅裡面，玩家飾演嘅係一位失憶少年「Peter」。就咁聽個設定，大家可能覺得似曾相識，「咪又係逃命走佬 Game？」

係嘅，Peter 固然要搵辦法離開呢間大宅，不過佢唔止要走咁簡單，佢仲需要喺大屋入面搵齊線索解開自己身世之謎；而玩家身處嘅大宅，話就話係廢屋，但係好多野對 Peter 黎講都好似好熟悉，好多房間陳設，仲好似有人而家住緊咁樣添。

講到咁，當然就係因為屋入面唔止玩家一個人，但係，到底同你同一屋簷下嘅，係邊個？而呢個「人」，似乎對玩家充滿敵意……至於屋裡面留低嘅各種殘影，到底係 Peter 嘅幻覺，定係有其他力量想講啲野比你知呢？

相信各位朋友未必認識遊戲工作室 Cracked Heads Games，呢間獨立工作室來自俄羅斯其中一個主體「薩哈共和國（Respublika Sakha）」，呢個地方有「世界最寒冷之地」嘅稱呼，因為當地氣溫經常處於零下 40 度！

到底生活喺一個咁凍地方嘅遊戲程式員，點解仲要開發一個令人心寒嘅遊戲……又，到底佢地帶比各位嘅呢隻《Silver Chains》又會唔會同佢地嘅家鄉一樣，令大家腳底寒一寒呢？

不如大家睇下呢條遊戲 Trailer，強烈建議開聲用 Headset 或者耳筒聽，感受遊戲真正嘅氣氛同埋壓迫感：