CAPCOM 旗下作品夠晒多，所以每隔一陣都會出返隻 CAPCOM 角色大亂鬥之類嘅遊戲，最為人所熟悉嘅應該就係「CAPCOM VS」系列，即係有《街霸》、《魔域戰士》等正統格鬥角色，但又會加埋《洛克人》、《生化危機》等動作遊戲角色一齊玩。不過咁多年黎大部份大亂鬥遊戲都係格鬥遊戲，對於不好此道嘅朋友始終無緣。但最近就流出一條遊戲片段，同樣綜合各 CAPCOM 角色，以卡牌遊戲面貌展開大亂鬥！

早幾日 YouTube Channel「Duel Links Meta」上傳咗一條影片，呢條影片內容係一隻叫做《Project Battle》嘅卡牌遊戲。特別之處係遊戲中出現春麗、洛克人、但丁、ADA、Morrigan 等著名 CAPCOM 角色，而每位角色都有自己專屬技能以及超必殺技動畫演出。

而遊戲嘅玩法感覺上同《爐石戰記》非常相似，每張卡牌同樣有攻擊力及血量 2 個數值，卡牌左上角亦有標明召喚該牌所需法力。當然遊戲亦有新加嘅系統，每次召喚卡牌就會獲得所需法力同等嘅「AP」，當「AP」累積到一定數值就可以使出角色超必殺技。除咗角色卡之外，當然仲有其他特別行動卡，有興趣嘅可以睇以下影片。

《Project Battle》官方暫時未有任何相關消息發布，但係影片開頭有明確地寫住「Tap the Screen」，相信對應平台會係手機及平板，推出日期未定。