平時我地喺遊戲扮演嘅主角，多數都係正派、拯救世界之類做好人好事。要做奸角搞破壞、大屠殺嘅，數數埋埋都唔係好多選擇。獨立遊戲開發公司 Phobia Game Studio 開發嘅呢隻《Carrion》，雖然只係橫向動作遊戲，但玩家可以大肆破壞同玩到血肉橫飛，似乎啱啱晒鍾意做奸角嘅朋友。

玩家扮演嘅係一隻被監禁喺實驗設施嘅不知明生物，為左消滅創造佢嘅人類而不斷吸收、成長、進化，而玩家唔好諗住淨係割草式大屠殺啊，仲要面對住設施入面嘅防禦武器同後來嘅武裝部隊，咁就要靠唔同嘅技能配合擊殺以及解同設施入面嘅裝置去繼續破壞，直至一切被消滅為止。

場景上好多物件都可以破壞，破壞後仲可能擺搵到新路線

破壞燈泡可以影響人類視線，潛行擊殺更容易

遊戲中搵到嘅新技能，唔單只係幫你過到版咁簡單，仲會多左好多「屠殺」嘅樂趣

2020 年先會發售，暫時只係公佈左確定會喺 Steam 度發售，家用機平台會有咩選擇，咁就要等發行商 Devolver Digital 再公佈啦！