遊戲《Marvel’s Avengers》於 E3 2019  時首次對外公佈之後，各界期待度以及意見都不一，當中唔少聲音係對遊戲版嘅人設抱有疑問，亦有好多玩家聽到遊戲係「支援線上聯機 4 人 Co-op 嘅五年計劃」之後，就不禁同《Anthem》或者《Destiny》系列嘅遊戲營運做比較。

針對「人設」嘅部份，早前開發工作室 Crystal Dynamics 就頗為企硬話「應該唔會改」，因為佢地想做到同電影版有唔同特色；但係，至於玩法方面，唔知係咪知道好多玩家對於「Online」嘅部份有所保留，工作室嘅大佬 Scott Amos 喺接受外媒 Game Industry 嘅訪問時就強調：「個遊戲唔係強制要 Online 玩，單機玩都一樣有樂趣。」

Square Enix 方面亦有承諾過，喺至少五年入面，會為《Marvel’s Avengers》定期推出新角色、新外觀、新地點以及新任務，務求令到選擇 Online 玩嘅朋友可以享受到最大樂趣，例如係你可以自訂「黑寡婦」角色令佢變得與眾不同。「令遊戲變得長壽」，係佢地嘅目標。

雖然事前出現唔少不明朗因素，不過作為玩家，一日未試玩過遊戲，我都唔敢斷言《Marvel’s Avengers》係好玩定係唔好玩；到底黎緊遊戲幾時會公開實機遊玩片段，或者今年電玩展或東京遊戲展會唔會提供試玩，就等我地有消息再進一步報導啦。

相關文章：
【遊戲新聞】美國隊長盔甲笨重・黑寡婦似男人《MARVEL’S AVENGERS》企硬唔會改人物設計