好多時候我地鍾意玩玩具嘅大細路，成日都比其他人有個直觀感覺係「淨係掛住玩，不問世事」。香港最近發生咁多重大事件，大家都發左好多「夢」，見住唔同嘅「夢境」分享同新聞都真係冇乜人有心機玩。不過作為有能力創作作品或者場景嘅製作人，有好多都對社會事件好關心，想用自己最了解嘅「素材」去帶出一啲內心說話或者感受，希望社會上更多嘅朋友關注自己愛護嘅地方或者社會議題。

呢組作品製作人唔想表露自己身份，不過佢認為積木除左係玩具之外，完成後同時係一件藝術品，而每一件藝術品都有佢背後想帶出嘅意義或者故事。製作完之後佢都驚會比人話太重政治意味，但係每個人都會想用自己嘅方式去令其他人關注身邊事，正如音樂人會用音樂創作去表達佢地情感，而佢就選擇左用佢嘅興趣去表達最近社會上發生嘅事。

Created by Kreal Production

Kreal Production 嘅 Kay Kay 特別提到佢喺作品上冇加上任何文字注解，只係想用作品去表達自己睇到嘅事情，希望其他見到佢作品嘅朋友多啲關注事件，同時作為市民嘅自己，亦應該為社會做返啲野。  

Created by Tc

外國製作者唔會太了解香港狀況，但喺一啲世界性議題或者事件上，有好多時候佢地都會用作品去提醒世人。好似韓籍製作人Lee Je Hyung，喺 64 當日都用作品去悼念天安門事件 30 週年，知道香港情況後亦用同一作品寄語「We pray for Hong kong.We support democracy. 」