今年 Nintendo Switch 最觸目嘅遊戲一定有呢隻，由桂正和 x 白金工作室製作嘅《ASTRAL CHAIN》（星雲鎖鏈）。日前官方放出一條長達十分鐘嘅影片，詳細介紹本作戰鬥系統，完全令人更加期待！

今次影片主要介紹遊戲戰鬥系統，《ASTRAL CHAIN》戰鬥核心係圍繞住生物兵器「レギオン（Legion）」，設定上一般人肉眼係睇唔到「Legion」的，類似「JoJo奇妙冒險」入面嘅替身。「Legion」本來係攻擊人類嘅怪物「奇美拉」（キメラ），但係人類將捕獲嘅怪物透過特殊裝甲將之拘束，而部份特定人類透過精神連接裝置可將之控制，不過萬一精神連接裝置斷開的話，「Legion」有機會掉轉槍頭攻擊人類。

由於召喚「Legion」會消耗使用者嘅精神力，所以戰鬥中不能無止境地使用，當藍白色嘅「Legion」計量表耗盡，短時間內將不能使用「Legion」。而「Legion」又分為五種類型，分別係：斬、狙、腕、獸、斧，每種類型都有各自特殊能力，加上玩家本身嘅三種武器，加埋有多達十五種嘅戰鬥風格。

係呢十五種戰鬥風格中，又會有三種玩法，分別係：「玩家連同 Legion 與同一敵人戰鬥」、「玩家與 Legion 分別和不同敵人戰鬥」以及「Legion 負責戰鬥，玩家負責輔助支援鬥」，不論選擇邊種類型，遊戲核心都係「拘束 + 同調」，即係同 Legion 互動嘅「雙重動作」（デュアルアクション）。

戰鬥中，玩家可透過 Legion 用鎖鏈拘束敵人，然後再共同發起攻擊，而係特定時機下可按鍵觸發強攻，成攻擊倒敵人後將破壞敵人核心並回復生命值。另外鎖鏈亦可用於快速接近敵人之用。

上面提及過「Legion」五種類型分別有以下特殊能力（暫時已知）：

斬：

斬擊（場景破壞）
干擾（讀取電子設備訊息）
集中（短時間內降低周邊時間流動）

狙：

狙擊（場景破壞、攻擊敵人弱點）
集中（短時間內降低周邊時間流動）

腕：

合體（變成鎧甲與玩家合體，可使用噢啦噢啦噢啦噢啦噢啦噢啦噢啦）
把握（可以推動重物）

獸：

騎乘（玩家可騎在獸快 Legion 上並增加移動速度）
挖掘（挖出埋藏於地下的道具）
嗅覺（用氣味尋找特定事物）

斧：

防禦（展開護罩抵擋敵人攻擊）
爆破（使用爆破攻擊破壞場景或攻擊敵人）

因為 Legion 可隨時切換，亦即係話戰鬥中應視情況隨機應變。例如敵人施展遠程攻擊，我方可先用斧「擋格」，然後成獸「騎乘」快速接近，再換成腕「合體」使出噢啦噢啦噢啦噢啦噢啦噢啦噢啦打爆敵人，戰術多變。

另外，每隻 Legion 都有自己嘅技能樹，當升級後可作出育成。

係影片中我地亦見到有城市探索部份，據了解本作整體設計介乎於《Nier》同《Bayonetta》之間，並非純動作遊戲。

《ASTRAL CHAIN》於 TV 及 Tablet 模式下皆支援二人同時遊玩，不過就未知係「一人扮演玩家、一人扮演 Legion」定係 2 人 2 Legion，而手提模式則確認只有單人遊玩。遊戲預計於 8 月 30 日發售，支援繁體中文，Nintendo Switch 獨佔。