於洛杉磯舉行嘅 E3 2019 已經順利告一段落，喺無咗 PlayStation 嘅 Showcase 之後，到底各位朋友又覺得今次 E3 公佈嘅資訊精唔精彩呢？（想知道 E3 2019 各遊戲詳細報導可以參考呢一度）
咁多個 Showcase 入面，個人覺得 Nintendo 嘅部份最缺乏驚喜，除左《薩爾達傳說：曠野之息》宣佈有續作之外，其餘消息好多都已於事前已經公佈過了。
我地編輯部就挑選咗部份「想知道最新發展，但係 E3 2019 提都無提過」嘅遊戲，唔知你地又會唔會有共鳴呢？
（1）Bayonetta 3（ベヨネッタ 3）
圖為《Bayonatta 1》圖片
早喺 2017 年尾，任記已經喺「The Game Awards 2017」宣佈《Bayonetta 3》已經在開發階段，並將會繼續 Switch 平台獨佔；不過事隔超過一年，公開片段依然係 2017 年嘅 Announcement 片，遊戲截圖同埋試玩片段依然欠奉，而遊戲消息更加係一個碩大問號。
（2）真・女神傳生 V（真・女神転生Ⅴ）
《真・女神転生Ⅴ》嘅公佈日子就再早啲，時為 2017 年 10 月份，當時公佈為 Switch 平台獨佔。作為 ALTUS 工作室皇牌 IP 之一，我地深明白到要令遊戲盡善盡美需要時間（要知道 A 社出品從來唔令人擔心）。
不過將近一年半後嘅今日，有關遊戲嘅新資訊都係一個謎團；反而係同社另一 IP《Persona 5》黎緊就會推出續篇《P5R》，而工作室早前亦推出左《Catherine: Full Body》。想感受 Altus 獨特世界觀嘅朋友，或者只能玩住呢兩個作品望梅止渴住先了。
（3）仁王 2（Nioh 2）
於今年 6 月份公佈並邀請 PS4 玩家進行「封測 α」嘅《仁王 2》於海外同樣地極受歡迎，所以 E3 2019 並無有關遊戲嘅更多片段或消息公佈，令到海外玩家頗為失望。補充：編輯部有幸得到參與封測嘅名額，操作感覺與上集似乎未有太大分別。
（4）The Last of Us Part II
早前我地報導過遊戲團隊宣稱開發已進入最後埋尾階段，不過，因為無左 PlayStation Showcase，好多 PS4 遊戲嘅消息都於 E3 2019 缺席似乎早在大家意料之內，除左《仁王 2》仲有《The Last Of Us Part II》。第一集推出時榮獲 Game Of The Year，事隔多年依然係好多玩家心中經典，各地玩家亦極度期待第二集推出。
（5）Ghost of Tsushima（對馬之鬼）
同上面兩隻遊戲一樣，無 PlayStation Showcase，都估到唔會有《Ghost Of Tsushima》嘅消息。同樣以戰國武士作為主題，不過公佈之時就馬上被《隻狼》搶去鋒頭，原以為《隻狼》熱潮消減後會有新消息公佈，點知連《仁王 2》出埋封測都仲係靜如水……。
（6）Skull ＆ Bones
Ubisoft 重頭作品《Skull & Bones》由公佈到而家已經兩度延遲，有玩過《刺客教條：黑旗》嘅朋友，應該會好記得入面嘅海戰部份，所以呢隻以海盜水戰為主題嘅遊戲一直受到玩家關注。不過，開發需時，根據 Ubisoft 方面消息，相信都要 2020 年先會玩到呢隻遊戲了。而家開發成點？好似話團隊出海去錄浪潮聲……。
Game 未出，不過已經決定改拍為電視劇，詳情按這裡。
（7）Babylon’s Fall
白金工作室開發，Square Enix 發行。E3 2018 發佈一條意味深長嘅概念影片，話今年會推出遊戲，然後……E3 2019，6 月份，呢隻話會今年出嘅遊戲，影都無。白金工作室早前被問到呢隻遊戲到底發生咩事，CEO 稻葉敦志只係講左一句，「你地不如去問返 Square Enix。」
睇黎，呢隻遊戲，好有可能會拖到 2046。
當然，相信仲有好多事前放風聲、但係一直無影嘅遊戲，唔知各位朋友心中抱有疑問嘅作品又有邊啲？今年東京遊戲展係 9 月 12 日～14 日，我地編輯部亦受邀請會出席進行採訪，唔知今年嘅 TGS 又會唔會提及上面嘅幾隻遊戲呢？
遊戲雜食向，FPS 苦手，全種類 RPG 專攻，重度聲優控。使用機種：Xbox Series X｜PS5｜Nintendo Switch｜Steam Deck。