於今次 Nintendo Direct E3 2019 裡面，最注目嘅消息相信絕對係《薩爾達傳說：曠野之息》續篇正在開發中，不過，有關《Zelda》嘅消息並唔止呢一樣，早知我地同大家報導過《薩爾達傳說：夢見島》宣佈重製嘅新聞，而喺 E3 裡面，遊戲終於有正式發售日期，就係今年嘅 9 月 20 日。

《薩爾達傳說：夢見島（ゼルダの伝説 夢をみる島）》首次推出為 1993 年，當時係 Game Boy 遊戲帶，筆者都未有機會玩過！9 月推出嘅，就係按照當時遊戲重新製作嘅 3D 重製版，不過無論係玩法定係操作，例如橫向捲軸推進、視點角度等，都儘量貼近返當年嘅舊版本，極有心思。

E3 2019 現場展示模型

重製版本亦有添加新元素，例如新 NPC「ダンペイさん」。「ダンペイさん」可以幫你製作個人化地城，玩家喺旅程當中會收集到唔同元素嘅「面版（Panel）」，你地拎住呢啲面版，就可以去搵 NPC 去製作自己嘅地城了。

呢啲面版可以喺故事劇情、寶箱以及 Boss 房間中得到，而玩家如果成功通過自己製作嘅地城關卡，仲會得到特別道具。

呢隻經典遊戲作為《薩爾達傳說》嘅第四集，可以話係當年非常出色嘅遊戲之一。今次重製版，相信無論係新舊玩家都能夠搵到你地嘅樂趣，9 月 20 日出，大家記得 Mark 低日子啦！