【玩物評測】LEGO建築系列特拉法加廣場開箱

好少同大家做 LEGO Architecture 系列嘅 Review，原因大家都覺得 Architecture 呢個系列真係除左擺靚靚之外就冇乜太特別，最多都只係見某特色建或城市景對玩家自己有深層意義先會入返盒去回憶一下。但今年 LEGO Architecture 產品中有一盒就完全打破晒玩家們一向對呢個系列一向嘅了解同睇法。

21045 Trafalgar Square – 1197件

唔好睇佢得 4 大部份，呢度十包組件就過千件架啦

今次 21045 Trafalgar Square 主題就話係特拉法加廣場，不過另一個大賣點其實放喺背後嘅建築 The National Gallery 國家美術館

講返少少特拉法加廣場嘅背景啦，1805年落成嘅特拉法加廣場一直都係比英國民眾用作社會活動同示威抗爭嘅重要場所。雖然特拉法加廣場有住非常濃厚嘅政治意味，但同時亦係英國民眾聚集慶祝聖誕、除夕等等嘅節目慶祝地點。

特拉法加廣場背後嘅 The National Gallery 國家美術館係全球十大最多參觀次嘅藝術博物館之一，而收藏作品超過 2 千幾件，而最出名嘅作品有達文西嘅《岩間聖母(Madonna of the Rocks)》、《聖母子、聖安妮和施洗者聖約翰(The Virgin and Child with St Anne and St John the Baptist)》同梵高嘅《花瓶裡的十五朵向日葵 (Vase with Fifteen Sunflowers)》。

而廣場同國家美術館其實就坐落喺英國倫敦市中心，附近你可以去埋白金漢宮、西敏寺、大笨鐘、London Eye 同埋 LEGO Fans 必到嘅李斯特廣場 LEGO Store。

製作過程

頭先講過 21045 Trafalgar Square 主要分成 4 大部份，廣場地基、國家美術館內、外以及廣場設施及裝飾，而淨係喺第一部份製作方式已經令玩們有啲新鮮感。首先今次有啲部份製作程序並非平時一層層由底到頂嘅方式，而係以另一種官方非常少見嘅製作程序展現。

唔穿太多橋，不過製作過程感覺真係好新鮮

而另一個新鮮感就嚟自廣場上梯級嘅製作方式，事關 21045 Trafalgar Square 比例係比 Microfigure 仲要細，但廣場上有唔少嘅梯級位置都好有標緻性，而 21045 Trafalgar Square 嘅設計師 Rok Zgalin Kobe 喺樓梯用件嘅方式亦極之精妙，如大家係想砌一啲相類似梯級嘅建築就更加要搵盒嚟參考參考。

國家美術館部份唔單只得外表，內裡亦有砌返展覽場景同用印刷件同其他組件去模仿展品擺放。而且預設左 3 個位置比玩家輕易打開見到展館中嘅情景，係 LEGO Architecture 產品一個非常出色嘅新嘗試。

呢個角度見到嘅幾件組件，喺外國都令 21045 帶嚟唔少風波

國家美術館外部就以大量 1×1 嘅組件橫放組成窗口，而正門長期掛上嘅直幡亦有用組件去還原。

最後係廣場上裝飾及其他設施嘅部份，除左花形噴水池、納爾遜紀念柱等等，仲加左啲車輛同英國特色嘅紅色雙層巴士喺當中。睇落成個 21045 Trafalgar Square 唔係一件純粹嘅建築模型，而有種活力同生氣喺成個場景當中。

花形噴水池

納爾遜紀念柱

不定期放置雕塑作品嘅第四雕塑基座

最後搵啲對比圖比大家睇睇，比例上的確有些少出入，但整體仔細度絕對滿分。

總結

毫無疑問 21045 Trafalgar Square 係 LEGO Architecture 產品一個新嘗試，不論係設計上、製作方法、用件等等都有住好多新衝擊，對玩開 Architecture 系列產品嘅朋友絕對係一個全新體驗，同時令一班對 Architecture 系列抱住固有觀感嘅朋友大大改觀。整體而言，將一個咁多細節嘅廣場同美術館微縮到呢個情況下都絕無失色，同時大量嘅新意加入。不論係對英國特色建築有愛好，定係想搵件唔太佔你生活空間嘅有趣擺設，21045 Trafalgar Square 絕對啱晒大家！

21045 Trafalgar Square