早前我地同大家報導過明年重頭遊戲《Marvel’s Avengers》，原本我地都以為係好似《Marvel’s Spider-Man》咁樣嘅單機遊戲，點知出到黎係 4 人聯機 Co-op，呢一點叫我地頗為驚喜嘅！喜，係因為「嘩好野又有得同朋友一齊打機」；驚，就係擔心「又聯機呀？得唔得架？個 Server 掂唔掂架？劇情夠唔夠架？唔好又好似《Destiny 2》《Anthem》咁爛爛地尾喎！」

OK，先唔講系統、唔講玩法。黎到 2019 年…或者遊戲推出時已經係 2020 年，當市面上咁多 3A 大作，你要做「大作」就要喺視覺上帶比玩家享受。當年《Spider-Man》無論係人設定係紐約景觀上都做得甚為討喜，所以綜觀黎講都係一隻風評唔錯嘅遊戲。

但係，而家講緊嘅係成個 Avengers 團隊，講緊嘅係每個角色（演員）嘅樣都已經深入民心嘅《復仇者聯盟》；偏偏呢隻《Marvel’s Avengers》就重新製作人物模樣模組，咁都唔緊要，但你要靚，起碼要型，先至說服到玩家接受新模樣。

靚……型……

遊戲影片公開之後，無論海外定係亞洲地區，相信大家嘅反應，都不禁，冒出，三個，黑人，問號。（因為太驚訝，所以忍唔住用咗「鄺體」；同埋我想借呢個機會，向鄺議員表示一分敬意。）

美國隊長件甲……咪住點解變左係甲嘅？佢套貼身衣呢？而家嘅造型成個防暴咁，真係令人不禁側目；而黑寡婦個樣，大家有時間上 Reddit 或者 Twitter 望下就會知，大家都問，佢個模組，有少少女生男相，真係稱唔上靚。

至於其他成員，有網友笑言「有種雙失中年嘅路人感覺」，的確，除左 Hulk 變綠變大左之後都無走樣之外，整體人設，喺網上面，近乎炎上，甚至出現大量惡搞圖片添：

＠Fandom

工作室 Crystal Dynamics 嘅首席創作總監 Shaun Escayg 向外媒 IGN 多次強調「團隊重視玩家社群聲音，會就大家意見作出改善」，但係，面對最多人嘅不滿係黎自「人設」呢一點嘅時候，聲稱好重視大家聲音嘅佢，就企硬「人物模組我地唔打算改噃！」

作為中立持平嘅遊戲編輯，我要講嘅係咁多；但係，作為玩家嘅話，我諗，一樣野未推出前已經有咁多反對聲音，係咪應該都正視、將我地嘅意見加以考慮呢？

我相信大家都係為左隻 Game 好。到底遊戲往後發展如何，我地會繼續為大家報導！

延伸閱讀：
【E3 2019】萬眾期待四人聯機動作遊戲《Marvel’s Avengers》明年五月登場