《FF7 Remake》消息繼續發佈中！相信唔少玩家都留意到，遊戲之前發放嘅片段裡面，赫然仲未見到其中一位女主角 Tifa 嘅身形，令唔少 Fans 大喊「還我 Tifa！」

原來，Tifa 嘅出場影片，留待今日 E3 2019 先至正式公開；作為《FF7》裡面男主角 Cloud 嘅青梅竹馬兼玩家可操作角色，拳法家 Tifa 喺玩家心目中嘅位置份量極高。今次展現片段依然為遊戲序盤，時間為主角一行人完成第一次爆破行動返到基地時嘅畫面。

影片入面亦都見到更詳細嘅戰鬥模式，隨住 ATB 充值而使用攻擊、技能或道具，而各角色嘅攻擊風格，隨住畫面進步亦有更加明顯嘅體現。有玩過《FFXV》嘅朋友應該會一秒上手，難得唔同嘅係，今次戰鬥中係可以切換使用其他角色的。

近日我拎返隻原版《FF 7》出黎玩，真係不禁感到時代嘅進步。明年 3 月 3 日《FF7 Remake》嘅繁體中文版會同步推出，想預約嘅朋友就自行留意返啦！

以下為 E3 2019 公開嘅最新片段：

至於早前三條公開嘅宣傳片，我地亦將佢整合為一條，有興趣嘅朋友可以享受埋！