今日 E3 展前發佈會上，Ubisoft 正式公開運動競技新作《Roller Champions》，除咗釋出實機遊戲片段之外，同時宣佈 E3 試玩版限時上架消息。

《Roller Champions》係一隻三對三團隊運動競技遊戲，所有玩家都係著住 Roller 係環型比賽場地中對戰。遊戲玩法係搶到球後，同隊隊友保持持球狀態後，最少繞地一周再將球射入框中得分。當然玩家亦都可以再繞多幾圈，但同時亦都增加敵隊搶球風險，率先取得 5 分隊伍勝利。比賽進行中雙方可以作出攻擊奪球，同早前上映嘅電影《銃夢》入面嘅「死亡球」類似，但當然唔會打到甩手甩腳啦。

《Roller Champions》現時已開放 E3 試玩版，試玩期由即日起到 6 月 14 日晚上 9 點止，試玩期只有四日。《Roller Champions》預計於 2020 年上半年推出，暫時只確定有 PC 版本。