Square Enix 今晨於 E3 嘅發佈會，最注目嘅除左尋日已經公佈發售日期嘅《FFVII Remake》，另一個萬眾期待嘅項目，相信就係《Marvel’s Avengers》嘅正式遊戲發佈！《Marvel’s Avengers》已經定於 2020 年 5 月15 日全球上市，對應平台為 PS4、Xbox One、PC、Google Stadia（！）。PS4 用家如果線上預訂遊戲，會同時取得優先試玩 Beta 嘅資格。

《Marvel’s Avengers》開發團結陣容強勁，包括曾開發《Tomb Raiders》嘅 Crystal Dynamics 團隊，仲得到 Marvel’s Entertainment 公司嘅直接協助。

遊戲劇本為全新編寫嘅故事，地理位置為三藩市。如果大家有玩過 PS4《Spider-Man》，相信大家都記得 Parker 路經復仇者大樓時，曾經出現「佢地全部人去哂西岸處理問題」嘅對白；今次《Marvel’s Avengers》故事發生喺三藩市，與 Parker 嘅說話，咁啱造成有趣嘅首尾呼應，唔知係專登定係咁啱得咁橋呢？

故事發生於「A-Day」之後，復仇者雖然阻止地球嘅危機，但係因為佢地嘅力量過於強大，為城市帶來重大破壞，結果「復仇者聯盟」一度被強行解散。遊戲始於呢件事嘅五年後，世界再次面對新嘅威脅，於是復仇者再次集結起來。

遊戲支援四人合力聯機組隊，初期登場復仇者為 Captain America、Black Widow、Tony Stark（Iron Man）、Thor、Bruce Banner（Hulk）。蟻俠預計亦會緊接住登場。官方形容呢個遊戲為「數年嘅計劃」，之後就算有新復仇者加入都係全部免費，遊戲內亦唔會有 Loot Box 之類嘅系統，所以課金唔會換來強大裝備！

官方明言，希望玩家專注同朋友合力戰鬥，享受遊戲樂趣；遊戲往後仲會有更多資料片更新，敬請期待。

Cyrstal Dynamics 一向就開發動作遊戲有豐富經驗，遊戲出自佢地手筆似乎都能夠令玩家放心期待；以下為遊戲宣傳片。