之前意外流出嘅《Watch Dogs》系列新作《Watch Dogs Legion》（看門狗：自由軍團），今日 Ubisoft 喺 E3 展前發佈會就正式公開遊戲實機遊玩示範影片，同時更宣佈於 2020 年上市。

《Watch Dogs Legion》同之前消息相同，遊戲舞台將設定於未來脫歐後嘅英國倫敦，人民飽受政府全面監控及高壓統治、同時亦有龐大嘅犯罪集團以及私人軍隊活躍於黑暗面，弱勢市民生活得極為困苦，反抗組織「DedSec」因而掘起。

玩家將擔任「DedSec」嘅一員，但係大家玩慣嘅遊戲唔同，本作並無特定核心主角，玩家係街上面見到嘅所有 NPC 都可以招募為新成員！當然每一位 NPC 都會有獨立隨機生成嘅能力、故事背景、配音、專屬任務等等，例如影片中展示角色「伊恩」就可以穿著光學迷彩衣避開敵人，亦有身手矯捷可操控搖控機械蜘蛛嘅最強阿婆。而角色加入後亦可以選擇職業以及提升駭客技能、無人機或戰鬥方式等等，玩家將可以扮演佢地任何一位進行任務。

每位 NPC 都有專屬能力、故事設定、任務等

「伊恩」可穿著光學迷彩衣避開敵人

就算係阿婆都好好打

有趣嘅地方係遊戲並無重生系統，萬一使用角色不幸死亡，該角色嘅任務進度就會停止，需要使用其他新角色去繼承任務進度。而遊戲最終目標就係將倫敦市由極權統治下解放，重建自由。

角色死咗就真係死

角色死亡後需要選擇其他角色承接任務進度

實機遊玩影片展示嘅戰鬥系統似乎有進一步強化，打鬥及槍戰表現更為俐落。另外遊戲支援 4人線上 Co-op，亦可以喺單人及線上遊戲之間共享大家嘅遊戲進度。《Watch Dogs Legion》預定於 2020 年 3 月 6 日發售，對應平台為 PS4、Xbox One、PC 及 Google Stadia。