Bandai Namco Entertainment 於今晨舉行嘅「Xbox E3 Briefing 2019」中宣佈，即將在 2020 年推出《傳奇》系列最新作品《Tales of Arise 破曉傳奇（テイルズ オブ アライズ）》，係繼工作室 2016 年推出《Tales of Berseria 緋夜傳奇》後久違的正傳作品，香港 Bandai 亦宣佈遊戲的繁體中文版亦會同年推出，對應平台為 PS4、Xbox 以及 Steam。

遊戲背景，為兩顆相連嘅星球：「達納」與「雷納」。300 年前，蔥鬱豐饒嘅「達納」，突然遭受擁有先進科學與魔法力量嘅「雷納」侵略，從此被「雷納」強行支配。

故事主角，就係分別居於兩個星球上的一對男女。

某日，戴著鐵面具嘅「達納」青年，與被族人追捕的「雷納」少女相遇；而佢地嘅邂逅，將會撼動兩顆星球嘅命運，而呢個亦係玩家即將面對嘅歷險開端。

同以往嘅《傳奇》系列一樣，今次嘅《破曉》一樣保留住濃烈嘅動畫既視感色彩，環境氛圍亦以水彩風格為主，營造強烈嘅「幻想風」。

不過隨住開發技術更加純熟，《破曉》同 Bandai 即將於今年年末推出嘅《CODE VEIN》一樣以 Unreal Engine 4 以及更加先進嘅技術去製作，戰鬥方式亦與過往嘅半回合式戰鬥略有不同，務求帶比玩家更加真實自然嘅臨場感。

首條公開嘅宣傳片段，的確明顯感受到團隊自《緋夜傳奇》推出後，技術上面更見成熟，而遊戲風格亦都更貼近現代遊戲嘅專業走向。唔少《傳奇》Fans 自從《TOZ》後都對系列失去信心，雖然《緋夜》於口碑上尚算理想，不過，到底可唔可以將《傳奇》系列重新打造為信心保證嘅遊戲 IP，我地都對呢一隻《破曉傳奇》感到非常好奇與期待。