每次都會令玩家有新遊戲體驗嘅 Electronic Arts（EA）今日進行展前發佈會，其中最令人觸目嘅作品非星戰新作《星球大戰 絕地：組織殞落》（Star Wars Jedi: Fallen Order）莫屬。係活動中放出一條長達十四分鐘嘅實機遊玩片段，質素令人驚艷！

《星球大戰 絕地：組織殞落》故事發生喺《Star Wars Episode III: Revenge of the Sith》之後，玩家將飾演於絕地大屠殺（第66號密令）下倖存嘅 Jedi 學徒「Cal」（由美劇《Gotham (葛咸城)》做 Joker 嘅 Cameron Monaghan 飾演），一邊同帝國對抗，一邊完成「光劍」訓練。而根據影片所展示嘅劇情，好有機會補完又或者會銜接《星球大戰外傳：俠盜一號》嘅故事，因為片中出現喺《星球大戰外傳：俠盜一號》中登場嘅 Saw Gerrera，由佢嘅衣著及年齡所推斷時間點應該係俠盜一號之前。

最重點嘅當然係戰鬥部份，影片中展示咗幾場使用光劍及原力嘅戰鬥過程。玩家可以好似電影入面咁使用光劍反射鐳射槍，亦可以成把劍掉出去攻擊。另外亦有展示各種原力。除咗基本嘅隔空取物（白兵屬可移動物體），亦都可以用原力拉敵人去自己身邊，之後可以選擇一刀插死佢又或者拎住隻敵兵去擋子彈，最令人意外嘅係可以用《Star Wars: The Force Awakens 》（星球大戰：原力覺醒）入面 Kylo Ren 果招「原力暫停」！

光劍擋子彈呢啲碎料啦！

原力暫停！

遠距離可以用飛劍

但係帝國軍都唔係淨得白兵同你打，遊戲中亦有高階敵人，雖然佢哋無得使用原力，但係呢類敵人識得破解部份招式。例如原力拉人埋身呢招，佢哋識得借助衝力發動攻擊，要打敗呢類敵人需要有返咁上下技巧。另外觀察所得，戰鬥中畫面下方會有二條能量槽，一條用於反射鐳射槍，另一條用於使用原力，二者皆會隨時間回復。

呢種敵人非常強，原力拉佢埋身只會自己中招

正面格劍基本上打唔入

不過原力暫停對佢係有效的

留意紅圈內能量槽，原力並非無限使用的

戰鬥表現出色外，一般場景亦都頗為有趣，遊戲中加入沿牆跑步等 Parkour 元素，亦有利用原力解謎嘅地方，算係做得幾全面。

雖然 EA 有《Anthem》前科，示範同實 Game 二回事，但係今次作品係由 Respawn Entertainment 製作（即係做《Apex》果間），都叫有返啲信心。《星球大戰 絕地：組織殞落》預定於 11 月 15 日推出，對應平台為 PS4、Xbox One 及 PC Origin。