《Pokemon GO》嘅成功令到唔少遊戲都想跟住呢套模式出返隻類似嘅野，繼《Harry Potter 巫師 GO》之後，有日本國民 RPG 之稱嘅《勇者鬥惡龍》都推出自家版本既「GO」，新作命名為《勇者鬥惡龍 Walk》（Dragon Quest Walk／ドラゴンクエストウォーク ），並且預計於 2019 年在 iOS／Android 推出。

《勇者鬥惡龍 Walk》由手游大廠 SQUARE ENIX 聯合 COLOPL 合力開發（即係《白貓 Project》果間廠），遊戲概念同《Pokemon GO》相似，都係於現實地圖上走動，有趣嘅係消息將採用 Google Maps  平台，亦即係話地圖會顯示得更細緻精準。官方亦都表明現實中具代表性嘅建築物會於遊戲中登場，例如發表會入面就出現咗東京鐵塔，大阪城、金閣寺等著名建築到時都會登場，係呢啲地標仲會有相關限定任務，只要玩家去到附近就會自然解放，不過日本城就應該唔會出現啦。

係地圖上玩家可以跟隨指示去目的地進行故事，又或者自由移動，不過任何時候玩家係地圖上都會見到熟悉嘅怪物，玩家可以點選呢啲怪物進行戰鬥，當然仲會有各種隨機任務以及迷宮供玩家探索，頭目就更加唔少得啦！

有主線故事！唔係漫無目的咁周圍捉怪！

主線故事有特定地方解鎖，黎到香港希望係返啲地鐵附近啦，出面天氣熱阿

遊戲中玩家可以組成最多四人隊伍，暫時已知登場職業有戰士、武鬥家、魔法師與僧侶。遊戲同《勇者鬥惡龍》同樣採回合制，迎敵時可使用攻擊、技能、道具或者防禦。戰鬥完畢後會得經驗值同金錢，當然亦都有升級系統，玩法上同傳統嘅勇者鬥惡龍非常相似，大家應該唔會陌生。

地圖上有啲罐可以補返 HP MP

另外係《勇者鬥惡龍 Walk》入面，每位玩家都可以係地圖上設定自己嘅屋企，仲可以幫自己間屋自訂各種傢私等等。當然大家亦都可以其他人屋企觀賞，仲可以執人地屋企嘅掉落物據為己有！！不過我都係鐘意走入人地屋企開衣櫃偷野多啲。

《勇者鬥惡龍 Walk》預計於 2019 年上市，6 月 11 日起就會於日本關東地區舉辦封測體驗會，到時候將招募 iOS／Android 用戶各一萬名搶先體驗。