身邊唔少朋友話「最近呢幾個月都無咩單機遊戲令人驚艷」，如果你都係咁諗，我強烈建議你留意一下今次寫嘅呢隻《A Plague Tale : Innocence（瘟疫傳說：無罪）》。遊戲由法國遊戲工作室 Asobo Studio 所開發，由於唔算係著名大廠，所以呢隻遊戲，或者一開始並未抓住你的眼球。

不過，自從玩過媒體試玩版之後，我已經對遊戲充滿期待；去到最近一口氣打爆機，無論係遊戲份量、劇本、畫面音效、故事深度等等，我都極為欣賞。

遊戲共 17 章劇情（最後一章為完結部份）。故事背景為 14 世紀嘅法國，當時嘅歐洲「鼠疫」橫行（或者比較文雅嘅講法為「黑死病」），唔少地方都因為疫症而滅村、滅城。

遊戲採用第三視點，女主角 Amicia，一位十四～五歲少女，本來係地方權貴「De Rune」家族嘅千金小姐，有一位五歲大嘅細佬 Hugo。不過，因為「Hugo 有病」，所以 Amicia 極少機會見到細佬，同時見到母親偏愛弟弟，與自己關係疏遠，所以 Amicia 一直非常唔開心。

但係，Amicia 見到嘅，只係表面嘅現象。佢並唔知道，無論係地方上面發生嘅鼠疫、母親嘅身份、家族嘅血緣、以及 Hugo 嘅「病」，全部都係連環緊扣，牽涉國家級嘅權力陰謀。

前導故事並唔長氣，一夜之間，Amicia 一家被「宗教審判所」滅族，失去一切嘅女主角，能夠做嘅，就只有帶住 Hugo 逃亡，因為「宗教審判所」搵緊嘅就係 Hugo。

你問我點解「宗教審判所」要勞師動眾搵個五歲小朋友？

之後嘅劇情，大家自己玩啦，《瘟》係一個故事主導嘅遊戲，預先被劇透就無意思了；我只能夠講，《瘟》嘅劇情安排，起承轉合做得非常出色，好多故事發展都令我驚訝，幕幕難忘！

開頭主角住嘅大宅

災難之後再回到舊居，變成咁…

不過，遊戲系統非常簡單易上手，劇本是既定的，並無話有咩選項分歧之類，玩家大部份時間操作女主角 Amicia，而隨住劇情推進，Amicia 嘅各項攻擊或輔助技能，就會逐個解鎖。

雖然遊戲並唔係動作遊戲，不過少量保命用攻擊元素還是有的，例如遇到擋路嘅士兵 Amicia 前期靠住彈弓同石仔戰勝宇宙（喂），中期逐步學識鍊金術（呢個唔算係劇透架吓！）之後，就會有更多輔助技能，例如點火，滅火，迷暈 etc。

火喺遊戲中係好重要嘅關鍵字，因為鼠疫，而老鼠係驚光驚火的。

我到而家都唔明彈弓加石仔點解可以爆人頭，亦都唔明點解可以掟斷金屬 w 不要問，只要信！

遊戲並唔存在「升 Level」呢個概念，但係你沿路探索，會收集到唔同嘅素材，可以用黎強化彈弓、或者加大袋仔容量等等。「收集」係遊戲中其中一個要素，你可以當係支線咁理解，唔收集直接衝劇情當然亦可以，但係收集到嘅物品，其實每一樣都豐富緊故事嘅背景。

不過，要收集齊哂啲野，係難的。利申我搵漏左幾樣，惟有二周目再戰了。

頭上嘅花都係收集元素之一

Upgrade 裝備

至於操作方面，《瘟》入面嘅 Bug 其實唔算多，頂多都係走位問題令到敵人卡住左；系統敏銳度我就覺得可以再改善。

例如係敵人視角。你如果玩潛行 Play 嘅，基本上佢地好難會真係 Detect 到你，所以潛行真係唔難。但係，佢地如果攻擊你呢，個精細度就好奇怪了。

舉個例：試過有敵人隔住部木頭車都可以射箭射中我，我真係黑人問號，乜阿生你枝箭識轉彎？又例如係，明明敵人離你有一段距離，你已經瞄準發射，但你永遠打佢唔到，但係佢就可以打到你……呢一啲部份，相信係遊戲中少有嘅缺點。

仲有上圖嘅呢種情況。我令老鼠去攻擊一個守衛，咁個守衛死左之後，就掉落左一份「酒精」。咁照道理「酒精」就係好重要嘅鍊金素材黎嘅，但係，你跌喺啲米奇堆入面，咁即係叫我攞定唔攞好呢…LOL

不過，就算系統上面未係完美，淨係劇本呢一部份，呢個遊戲已經值回票價。

先講故事大綱。我一開始都以為故事只係講「兩姐弟遇到鼠疫，所以要走佬」；點知，鼠疫只係個故事背景咋，真正嘅故事係「宗教審判所」想要稱霸國家。

簡單黎講，《瘟》嘅故事，除左黑死病殺人事件，又有鍊金術，又有血源詛咒（！？），驚奇程度，驚奇過 Kinda 出奇蛋。又講開，知道故事有鍊金術元素之後，我個心一直響起「若被傷害夠～就用一對手～」。對唔住。

米奇黑旋風

好多網友話「真係好唔鍾意細佬 Hugo」，係嘅，我明，大難當前，佢當我又無咩感情，成日扭計，真係好煩；亦有好多人話「家姐 Amicia 太唔成熟啦，對住個細路咁躁做乜」，吖，我都明喎，你同個五歲細路講人情世故，係咪痴線左少少？

無論係 Amicia 定係 Hugo，兩個都係我好喜愛嘅角色。喂，兩個加埋先剛剛好 20 歲咋，嗰時仲要講緊 14 世紀與世隔絕無 iPhone 上網睇 Google 啊，你 Expect 呢兩個嬌生慣養嘅有錢細路，心智有幾成熟？

故事唔止劇本吸引，角色性格描寫亦都非常出色，特別係 Amicia。Amicia 一直妒忌細佬 Hugo 得到母親關心，加上好少見面，所以對 Hugo 根本無咩感情可言。結果，自己一路上要逃命、要湊仔，Amicia 因為恐懼，因為不安，經常同 Hugo 產生磨擦。

去到後期，慢慢見到 Amicia 逼迫自己成長，逼迫自己成熟；玩到後期，我真係好想同 Amicia 講一句「摸摸頭，辛苦你了」，以一個十幾歲少女黎講，佢已經做得好好。

Hugo 嘅角色，其實亦都窩心的，佢嘅世界沒有邪惡，佢只係一個好單純嘅小朋友。

雖然上面我講到姐弟情好 Warm 咁，不過《瘟》係一個好殘酷嘅故事，到底要犧牲啲乜黎換取自己可以生存，便當，喺遊戲入面是常態了。但係，或者正因如此，故事亦更加真實，令人難忘。

故事裡面其實留低唔少伏筆，似乎鋪哂路可以出第二集。如果真係有嘅，我都會好期待。

故事一流，音效一流，畫面亦都極靚，呢隻《A Plague Tale : Innocence（瘟疫傳說：無罪）》，已經於 5 月 14 日於 PS4、Windows 以及 XBox 上市，英及外語全語音，字幕對應簡體中文、英文及其他外語。我自己就玩英文版的，英文版嘅對白以及用字頗為 Poetic，呢一點要再讚！

極力向大家推薦呢隻《A Plague Tale : Innocence（瘟疫傳說：無罪）》。