射擊遊戲界嘅名牌《Call of Duty: Modern Warfare》（MW限定）終於推出新作！Activision 宣布，《Call of Duty: Modern Warfare》最新作將於今年 10 月 25 日推出。今次作品並非以續作之名推出，而係將系列 Reboot，不過就會保留返原系列世界觀，同時重新製作全部內容，當然劇情亦都包括在內。

《Call of Duty: Modern Warfare》系列最精彩嘅地方一定係佢嘅劇情模式，係 FPS 類型遊戲中佢絕對係最出色嘅一員，呢樣野相信無乜人有異議。遊戲入面一眾角色例如 Captain Price、Ghost 等令人極之印象深刻，回想返當年 Ghost 被背叛一幕，仍然瀝瀝在目，而呢種出色嘅劇情表現咁多年黎亦只有少數射擊遊戲做得到。

今次 Reboot 仍然由原團隊 Infinity Ward 操刀，而根據外媒 The Verge 嘅報導，單人戰役設計總監 Jacob Minkoff 有提及「為咗製作一隻附合 2019 年嘅現代戰爭遊戲，必需將舊有故事情節放下，但依然會係 MW」，同時仲有有提到遊戲將以大家熟悉嘅角色作為遊戲特色之一，Captain Price 當然包括在內，並將佢地置於更現代嘅環境之中，亦即係意味住舊角色會有新嘅劇情及遭遇，希望 Ghost BB 唔洗再死多次啦！

《Call of Duty: Modern Warfare》嘅單人戰役模式將分為二部份，玩家將扮演高級特殊戰士兵，遊走於灰色地帶作戰；另一部份玩家將扮演中東叛軍士兵執行各種任務。鑑於以往「No Russian」事件，未知團隊會否以敏感議題作為遊戲劇情一部份。

《Call of Duty: Modern Warfare》將於 10 月 25 日上市，對應平台為 PS4  / Xbox One 及 PC（Battle.net）。