KOEI TEMCO 旗下嘅美少女遊戲專門工作室 GUST 又獻新作，宣佈 2019 年秋天將會為玩家再次帶來《鍊金術師》系列新遊戲《ライザのアトリエ（Atelier Ryza）》，對應平台為 PS4、Nintendo Switch 以及 Steam，家用機版 6 月 6 日開始網上預購，Steam 版則有待公佈。

《鍊金術師》遊戲一向出得密集，工作室喺今年 3 月 20 日先推出對上一隻《露露亞的鍊金工房 〜亞蘭德之鍊金術士4〜（ルルアのアトリエ～アーランドの錬金術士4～ ）》。咁短時間內推出兩隻極為類似嘅作品，有唔少網友都不禁發問「係咪又係換湯不換藥？」

官方或者係知道玩家有咁嘅疑問，同時亦都好怕被定型，所以喺新作消息公佈同時，官方好強調《Atelier Ryza》喺動作以及鍊成系統上面都會有「大革新」。

雖然目前新要素係啲咩，都仲係一個謎，不過對於熟悉日本二次元文化嘅朋友黎講，《Atelier Ryza》仲有一個注目要點！就係佢嘅劇本創作，將會由高橋彌七郎老師，亦即係大熱作品《灼眼的夏娜》嘅原作者擔當！

《鍊金術師》系列黎到 2019 年剛好迎來 20 周年，到底高橋老師嘅加入可以為《Atelier Ryza》帶來咩野新火花？另外，連同呢隻新作在內嘅話，GUST 工作室淨係今年已經發售左三隻《鍊金術師》系列作品，而工作室對上一隻其他遊戲，已經講緊係 2017 年 8 月推出嘅《よるのないくに 2 ～新月の花嫁～（無夜國度 2～新月新娘～）》。

偏重某個系列嘅發展，對工作室又係唔係一件好事呢？