《Mortal Kombat》系列，香港叫開做《真人快打》，呢個系列最出名既當然就係各種極有「創意」既終結技。隨住科技發達畫面越黎越精細，《MK》系列既暴力演出就更加逼真。早前系列最新作《Mortal Kombat 11》就推出咗，咁到底佢係咪一隻齋賣弄血腥既遊戲？
《Motal Kombat 11》係一隻美式平面格鬥遊戲，同大家打開既《街霸》、《拳皇》有一個地方好唔同，就係佢既擋格方式由拉後擋變成要按檔格鍵，呢個按鍵多數出現係立體格鬥遊戲如《Virtual Fighter》上，比較少出現係平面格鬥遊戲。
另一個不同之處既係本作既必殺技指令偏簡單，絕大多數都係 ↓→ / ↓←+按鍵，又或者係 ←→+按鍵（無需儲力），非常易用。而且本作既連續技大多數只要 Chok 一次必殺技就可以打出唔錯既傷害，而連技主要構成都係 TC（Target Combo，後面會講解），基本上識撳制就出到，簡單易上手。
必殺技指令大多偏簡單
雖然話必殺技指令簡單，但係唔少人依然會覺得有難度，然後就對格鬥遊戲卻步。不過係《Mortal Kombat 11》入面，只要掌握到點用 TC（Target Combo），就可以感受到格鬥遊戲基本既好玩之處（當然學識埋 Chok 招就更好）。
TC（Target Combo）簡單黎講即係由拳腳組成既固有 Combo，最經典既莫過於《魔域戰士》既輕拳>輕腳>重拳>重腳。黎到《Mortal Kombat 11》，每個角色都擁有多種 TC，而呢堆 TC 入面起碼有一招可以作出不同派生。
例如主角「Scorpion」其中一招 TC ←+1 > 2 > 1（MK拳腳按鍵一般會以 1 /2/3/4 黎區分），呢招 TC 最後一下「1」技會變成下段技，需要蹲下擋格。
但係同一招 TC 如果最尾果下改做 2，變成 ←+1 > 2 > 2，則會變成中段技，要站立擋格，熟集角色每招 TC 之後，同人對戰淨係玩估擋上擋下定係使用投技，成件事已經好多變化。
當然每個角色都有多於一招 TC 可以作出連技，例如「Scorpion」TC ←+1 > 2 後，可以接上 ↓←+3，已經係一招簡單連技。如果尾段既 ↓←+3 使用一格氣變為強化版的話，更可以打出另一招 TC 收尾，傷害亦都見得人。
簡單一招連技已經有唔錯傷害
不得不提本作既教學模式做非常之好，簡單易明同時唔累贅
遊戲其中一個特點係場景有道具可供使用，圖為拿取場邊燃燒木頭攻擊
亦有防守類場景道具
遊戲基本系統就講到呢度，留返比大家鑽研，反而想介紹一下本作既故事模式。
《Mortal Kombat》系列係外國擁有超龐大 Fans 群，除咗遊戲仲有推出漫畫同電影，所以每集《Mortal Kombat》既故事模式都落足心機。係每關開始之前，會有一段動畫講述故事情節，播完片之後就正式開打，戰勝後進入下一關卡前再次播片交代故事情節，極有睇劇味道。有趣既係，去到後面既劇情因為經常多人行動，玩家可以選擇出戰角色，因應選擇角色不同而會出現不同情節，幾有心思。
故事模式好似睇劇咁，不過如無玩過舊作的話就未必追到劇情，上 Youtube 補完啦
故事中後期有得揀出戰角色，想睇晒成個故事就要玩晒二隻人
每位角色仲有專屬劇情，係另外一個模式中可以玩得到
另外本作仲有多個遊玩模式，玩家透過遊玩呢啲模式可以得到唔同裝束同技能招式，就連終結技都可以係呢啲模式中解鎖。玩家可於「自訂角色」中自由設定自己心儀既角色，不過自訂技能角色無法用於網上排名戰，需要注意。
連招式都可以自訂
每位角色預設二組技能組，可因應對手決定用咩技能出戰
《Mortal Kombat》系列最出名既「Finish Him」終結技，每位角色其實都有二招。一招顯示於出招表，另一招隱藏技需要解鎖後先會顯示出招指令，不過如果已經知道指令的話仍然可以使出。
隱藏終結技！
總結
《Mortal Kombat 11》有別於大家玩開既日系格鬥遊戲，例如《街霸》、《拳王》。但係唔代表佢唔好玩，相反當你習慣呢套模式後，會發現呢個系列有佢好玩之處。最顯然易見既就係佢係非常之易入手，只要熟記三到四招 TC 就可以出去同人打，當然要打得叻同樣需要時間磨練。
而個人覺得做得最好既地方就係佢既網絡連線，一般黎講同外國玩家對戰都會幾 Lag 機的，但係《Mortal Kombat 11》係呢方面相信係用咗黑科技，我試過連英國、美國玩家對戰都唔太感覺到 Lag 機，非常抵讚。
《Mortal Kombat 11》已經推出，對應平台 PS4 / Xbox One /Nintendo Switch / PC，同時相信係 NS 上暴力血腥度最高既遊戲。
VJGamer總編，細細個已經蒲機舖，機齡甚深，熱愛電玩文化。