《Kingdom Hearts 王國之心》系列由 2002 年推出第一集到而家，已經渡過了 17 個年頭。黎到 2019 年，終於推出正傳嘅第三集《Kingdom Hearts III》，相信本身係 Fans 嘅朋友一定會好開心。

《KH3》承續住前兩集嘅劇情，Sora 今集開始踏上尋找記憶的旅程。呢篇感想無劇透成份，大家可以放心閱讀～（又或者最大劇透就係文章 Cover 圖片，哈哈！ ）

《KH3》同 Square Enix 同廠另一大牌作品《Final Fantasy》系列唔同，《FF》作品大多獨立成章，而《KH》每一代遊戲故事都與上回緊扣延續，所以，如果你無玩過前作，一黎就玩《KH3》，對唔住，因為相信你一定會跟唔上劇情，咁樣真係好可惜呀！劇情係《KH》最精彩嘅部份。

雖然遊戲中有「前傳導讀」嘅動畫介紹，不過個人認為並不足以掌握角色嘅來龍去脈。如果你已經無辦法或者時間去重溫以前登錄喺眾多平台（正傳兩集皆為 PS2 年代，其餘亦有 NDS、PSP 等）嘅話，可以取巧一啲，上 Youtube 搜尋，你會見到好多熱心玩家將《KH》歷代故事做一個濃縮、速成嘅時序介紹。

回到《KH3》本身，今集最觸目嘅登場作品，有《Toy’s Story（反斗奇兵）》《Frozen（冰雪奇緣）》以及《Pirates of the Caribbean: At World’s End（加勒比海盜：魔盜王終極之戰）》等等，假如本身你係迪士尼作品 Fans，應該會極為興奮。

就算唔係 Fans，就算你一套迪士尼作品都無睇過，遊戲中重塑各個世界嘅畫面，真係靚絕，英文版仲要用返電影版原班人馬配音，真係誠意至極。例如《加勒比海盜》Johnny Depp 一出場，啲人物模組，無論係眉目神情，或者係一路講野一路手指擺動嘅小動作，像真度之高，真係驚艷到我呢！

佢兩個都好似！

每個迪士尼世界裡面要達成嘅任務都唔同，關卡、敵人亦會不一樣，每擊破一個世界，就會獲得以嗰個世界為主題嘅鑰刀一把；例如衝破《Frozen》劇本就會有冰屬性鑰刀。敵人方面，Nobody 以及  Heartless 會交替出場，而每一個世界嘅最終頭目，就係 XIII 機關嘅其中一人，每位 XIII 機關成員出現都會交代一定劇情。

不過，今次《KH3》表面上係開放世界，但係實際上，假設你進入左《Toy’s Story》劇本，就只會見到《Toy’s Story》故事嘅角色，其他作品角色並唔會交換穿越去其他世界裡面。

因此，攻略遊戲嘅 Pattern 就係 A、B、C、D 咁樣一個單線嘅順序，實在有點可惜呀，難得集合咁多大作品嘅角色，可以於世界與世界之間，做一啲融合或者 Crossover 相信會更加有趣。

《FF》元素還是有的，不過是以不一樣的方式（？）

至於穿梭世界與世界之間嘅積木船模式，依然好玩。除左可以自己組件砌船之外，仲有啲非常有趣嘅模組，例如我用嘅係《FF》裡面登場嘅 Kupo；同埋呢個穿梭世界嘅積木船模式，其實係一個非常上癮嘅簡單射擊遊戲，仲有收集元素。

我喺呢度花嘅時間，可能同打主線劇情嘅時間差唔多……

戰鬥方面，遊戲難度你 Set 得越高，敵人血量就會越厚。當然唔係話遊戲難度只有「厚血同唔厚血」嘅分別，畢竟係動作式 RPG，面對排山倒海的敵人，戰鬥難度還是有的，所以努力整合裝備都好緊要。

例如升級鑰刀，每升一級都需要更多（更高級）嘅素材，所以遊戲絕對唔係一味靠衝就完攻略完成的，同埋靠衝都無用，因為每個迪士尼世界嘅篇幅都頗長（笑）要真正進入《KH3》核心劇情篇幅，都真係好後期嘅事了。

有唔係《KH》系列 Fans 兼唔對迪士尼無感嘅網友曾經同我表示，淨係玩《KH3》前半部，睇迪士尼故事睇到好悶，結果中途棄左 Game。

喺呢度我只可以同大家講一句，遊戲後半部先係精粹，進入核心篇章之後，基本上係一秒進入劇情高潮，無論係作為「賽亞諾特篇」嘅完結，抑或作為《KH》世界觀之後動向嘅新啟示，係會有驚喜的。

唔劇透！淨係睇圖！

我係玩《Kingdom Hearts》日文版的，而繁體中文版今日上市（2019 年 5 月 23 日）！《KH3》整體上黎講係一隻做得非常唔錯嘅遊戲，遊戲時間亦相當長，絕對係近期亮眼 RPG 之選。