今年較早時份，曾經同大家介紹過呢隻即將由 Square Enix 發行嘅華麗和風 RPG《鬼ノ哭ク邦》，遊戲由曾經製作 RPG 遊戲《いけにえと雪のセツナ》以及《LOST SPHERE》嘅新紮工作室 Tokyo RPG Factory 所開發；呢兩隻傳統王道 RPG 為 Tokyo RPG Factory 打響名堂，所以今次再推出新遊戲，倍受各界玩家注目。

官方剛剛宣佈，《鬼ノ哭ク邦》將於 2019 年 8 月 22 日於 Nintendo Switch 以及 PS4 平台上同步發行，定價為 5,800円（未連稅）；Steam 版發售日及價錢就會稍後再公報。

官方同時發佈《鬼ノ哭ク邦》嘅最新介紹影片，玩家於遊戲中可以「轉職」（遊戲中稱為「鬼ビ人」）去使用唔同武器；其實呢啲武器係玩家一路推進劇情時所拯救嘅「靈魂」，佢地會成為你嘅力量，化身為弩、槍、斧等各種唔同武器，而各種武器擁有唔同技能。

人設極靚！

如果你有玩過 Tokyo RPG Factory 嘅前兩隻作品，今次呢隻新作嘅戰鬥系統亦都令人期待，因為遊戲告別回合制，起用即時戰鬥模式，動作成份比重大增，對於一向做開傳統 RPG 嘅工作室黎講，絕對係一大創新。

PS4 日版 PS Store 即日開始遊戲預購，預購嘅朋友可以獲得遊戲內專用槍具，以及動態 PS4 主題。

相關文章：

【和風美學】於死界守護輪迴往生者《鬼ノ哭ク邦》Tokyo RPG Factory 今夏又一力作