等到頸都長既《Monster Hunter World》大型 DLC，終於有正式詳細內容公布。本身已經有《Monster Hunter World》既玩家只要購買 DLC 即可遊玩，另外亦會有新既《Monster Hunter World : Iceborne》實體版發售。家用機版本將於 9 月 6 日全球同步推出，至於 Steam 版本就要冬季先有。

新地圖「永霜凍土」

《Monster Hunter World : Iceborne》將會追加新地圖「永霜凍土」，淨睇個名已經知道要飲熱飲，而且有各種兇猛既魔物棲息係呢個無人踏足過既地方。

新地圖內有積雪地型，玩家需要飲熱飲先可以避免進入寒冷狀態（加大體力消耗量），有趣既係玩家就算唔記得帶熱飲，係本地圖可以前往「天然溫泉」，浸完之後同樣可有驅寒保暖之效。

「永霜凍土」有各種新既環境生物及魔物，其中既「雪球蟲」會射粒雪球出黎，呢個雪球碎開後會留低製作投射器彈藥既素材「爆裂結晶」。

新任務等級「Master Rank」

將會新增比「下位」、「上位」難度更高既任務等級「Master Rank」，難度同過往系列「G位」相約。當然「Master Rank」完成任務後將會追加新素材，即係大家又要全部刷過晒，Yeah！

新輔助道具「飛翔爪」

投射器新增輔助性道具「飛翔爪」，使用方法係射擊魔物，然後會將自身拉去魔物身上攀爬，係魔物身上時可以進行特殊移動。如果拉自身去魔物頭部的話，更加可以做出攻擊又或者揍飛二種行動。而揍飛呢個動作可以將魔物打到轉向，可以將轟到佢撞牆又或者轟到佢落陷阱，甚至可以打去有得用地型攻擊既位置，令到戰鬥方式更多變化。

攀爬係魔物身上時，同樣可以使出特殊終結技，同樣會依據武器類型而有所分別。

投射器強化靈活度大增

新版本既投射器唔再需要收刀使用，改版後所有武器都可以係拔刀狀態下使用投射器（片手劍：無言），而且唔限使用道具種類。另外新版投射器更可以係攻擊中使用，例如大劍儲力斬 > 閃光彈 > 斬，靈活性大增，相信將會有大量連續技出現。

除咗投射器強化之外，所有武器類型都會有新連續技及新要素，最值得留意既就係輕弩新動作，玩家可以以一邊進行迴避一邊上彈，超級靈活，變相令遊戲節奏變得更快。

追加「永霜凍土」大型魔物

暫時公布四種大型魔物，分別係新主題魔物，古龍「冰呪龍」、前期登場既「猛牛龍」、潛藏於冰層既「冰魚龍」以及老朋友「迅龍」。

新主線主角「冰呪龍」，未知具體攻擊模式，會有冰屬性攻擊，同時仲擁有多種不同既攻擊手段。

擁有巨大雙角既「猛牛龍」，DLC 初期登場。主要攻擊模式係「火車」，即係衝撞。特式係佢會附帶其他物品一齊攻擊，例如多樹木區域就會夾住棵樹衝埋黎，呢個時候橫向攻擊範圍大增；亦會夾巨型岩石增加直線攻擊距離，即使同樣既衝撞但係會有不同既攻擊距離，需要注意。

相關影片：

「冰魚龍」長期時間潛藏於冰層下，淨係會突個頭劃開冰塊移動。似乎使用遠程攻擊攻略比較有利，未知會唔會好似過往其他作品有得「釣」佢上黎。

相關影片：

老朋友「迅龍」，於《MHP 2G》初登場。有極高活動能力及爆發力，舊有攻擊招式將會保留，但就未知會否有新招。

相關影片：

《Monster Hunter World : Iceborne》家用版將於 2019 年 9 月 6 日全球同步發售，下載版以外仲會有三種包含《Monster Hunter World》遊戲本篇既實體版發售，詳情請到官網查看。

完整繁體中文版特備節目：