Sony Interactive Entertainment（SIE）於今晨嘅「State of Play」環節公佈左一連串遊戲消息，而當中最觸目嘅其中一樣事情，相信絕對係千呼萬喚到幾乎成為都市傳說嘅《Final Fantasy VII REMAKE》，終於有新遊戲片段公開。

遊戲片段公開嘅都係遊戲比較早期劇情嘅剪影（熔爐部份），不過可以見到《FF7 Remake》嘅遊玩系統將極為近似《FF15》，無論係即時戰鬥系統、以及操作界面，對於有玩過《FF15》嘅朋友黎講，應該份外有親切感。

雖然事前已經有唔少推測話《FF7 Remake》所用系統同《FF15》將會相當類近，不過見到真實戰鬥畫面之後，呢一點都係令人興奮期待的，畢竟《FF15》成個遊戲最備受讚美嘅並唔係劇本，而係系統；將呢個系統沿用落《FF7 Remake》入面去應用，作為《FF》Fans，我對遊戲嘅期待值再次上昇到最高點！

至於角色模組方面，出品廠係 Square Enix 呀，顏值以及人物比例絕對係信心保證，不過影片中見到唔少 Aerith 嘅大特寫，對於熟悉故事嘅玩家黎講，再次見到佢精靈可愛模樣，真係份外唏噓…。

今次公開片段入面，亦都聽到部份角色語音，以日版語音為例，非常感謝 SE 喺主角群上，依然起用原版聲優陣容，例如男主角步行鳥頭 Cloud 聲優依然為櫻井孝宏等等；對於忠於日文版本嘅 Fans 黎講，呢度絕對亦係賣點之一。

不過，今次呢個片段只係類似公告之類，話比玩家知道「個遊戲的確正在進行當中」，至於進一步消息，官方就話會留待 6 月份時再作詳細公佈。雖然見到新片段好開心，然而，一日未有正式發售日，大家都係耐心等待罷啦（笑）！

作為 Fans，雖然好想快啲玩到《FF7 Remake》，不過我寧願佢慢工出細貨，將經典重新塑造為另一個經典，咁呢件事就真係無遺憾啦。

6 月份，我地再同大家跟進到底遊戲有咩新消息吧！