主打喪屍海+求生既遊戲市面上真係唔算多，有質素既更加係少之又少。最近 PS4 上就出咗隻喪屍求生 Game《Days Gone》，評價就好壞參半，咁其實呢隻遊戲入唔入得過呢？我地為大家簡單咁做返個評測先！
《Days Gone》遊戲背景講述全球發生大規模感染，導致大量人類變成為喪屍既末世。事件倖存者 Deacon 係呢個末世當上賞金獵人，一邊對抗異變喪屍，一邊同倖存既人類派系角力。遊戲採用第三身視點，開放式世界。至於製作引擎就係大家見慣見熟既 Unreal Engine 4，不過遊戲畫面上既表現就唔算話突出，中規中矩咁啦。
不得不提既係呢隻遊戲既日夜變化、動態天侯系統運用得幾好，唔係講緊夜晚喪屍會比較活躍及富攻擊性呢啲基本野，而係佢充分運用天氣特性。例如落雨時有雨聲掩護、路面會變得較滑、起霧時會令你睇唔清道路有機會直接衝入喪屍堆等等，各種動態環境表現得相當唔錯。
天氣系統的確係做得唔錯
雖然而家開放世界並唔係咩新野，但係當中依然有唔少弊病，而《Days Gone》製作團隊明顯地有諗過點樣去改善，其中一樣就係 Fast Travel。
開放世界遊戲因為版圖太大既關係，如果下下要你行過去的話大家都應該會直接棄 Game，所以就咗 Fast Travel 呢樣野。但係呢個系統亦有佢既毛病，雖然係可以快速咁去到另一個地方，但係就會令到玩家「遊歷」既經驗大打折扣，往往玩到最後大家都係點對點飛就算，最經典既例子可以睇下「Elder Scrolls V: Skyrim」。
係處理呢個問題上，各廠商既做法都不盡相同，好似《巫師 3》咁就將 Fast Travel 變成一個 Check Point，呢啲 Check Point 全部都距離城鎮等目的地有一段距離，就算飛到去 Check Point 都仲要行一段路，留返探索空間比玩家，呢種做法的確唔錯，而《Days Gone》係呢方面就更進一步。
《Days Gone》同樣採用飛去 Check Point 既形式，但係要使用 Fast Travel 就需要清除每個 Point 之間既感染區，呢點令到清理區域變得有意義。而且當玩家使用 Fast Travel 係需要計算耗油量，當油量不足時玩家就需要規劃去邊個點找尋加油站又或者搵油桶，然後再繼續上路。係呢個過程入面會發生各種隨機事件，例如拯救生還者、大量喪屍潮等等，令旅程有更多變數。
Fast Travel 係呢個遊戲做得幾出色
時刻要計算耗油量，無油就要落車搵資源
除咗要落車搵野之外，駕駛途中同樣會有突發隨機事件，有時係喪屍飛撲、有時係野狼追咬，呢啲情況都會有 QTE 比你玩。另外仲會有機會比其他人類狙擊手襲擊、鋼索陷阱、地雷等等，而且因為隨機發生關係，就算行同一條路都未必再發生一樣既事件，即使駕駛中都要打醒精神，令到玩家更有末世生存既真實感。
好多時行行會出現「?」，通常都係一啲救人之類既隨機事件
圖為被狙擊手偷襲，因為太痛所以震到幅 Cap 圖咁
咁點解呢隻遊戲評價好壞參半呢？相信最大問題係出係劇情部份。
《Days Gone》都係一隻劇情主導既遊戲，任務自然係核心所在，不過佢既任務同大家玩開啲 RPG Game 有啲分別，並無明確既所謂主線任務。玩家會不停接到大量支線任務，而呢堆支線任務又會互相交織，依靠推進呢啲支線任務，慢慢就會成為主線劇情既一部份。
就咁聽就好似正，但係實際玩時就會因為個個任務都係玩得一部份，令到整體遊戲節奏混亂以及劇情零碎，幸好去到後少少既部份因為有明顯既故事主軸，係敘事上有所改善。咁既任務敘事手法係新嘗試，亦都貼近大家既日常生活（有邊個人係日常生活唔洗同時兼顧多樣工作？），不過製作團隊係呢部份處理得唔好。當大部份人都「捱」唔到前面果 Part，再加上前期既宣傳導致對遊戲產生過大期望，所以造成評價不一既情況。
同時出現太多劇情，但係又無法一氣呵成玩晒佢，令到故事變得唔完整
除咗劇情部份，角色塑造亦都有啲出事。主角週邊雖然會有大量互動角色，不過多數要求幫忙之類。最多互動既角色就係光頭佬「酒鬼」，問題係佢係幫唔到手之餘仲令人覺得佢佗手掕腳，除咗煩膠之外真係感受唔到第二樣野，基本上唔會對遊戲入面特定角色有咩印象。
《Far Cry》係角色塑造叫做幾有心思，好似呢個外星迷咁我就對佢好有印象，但其實佢戲份非常少
當然遊戲仲又唔少問題，例如要開 Fast Travel 就要清除該區域內全數喪屍巢穴，不過地圖並無明確表示巢穴所在地方，玩家需要係一個唔算細既任務區域內，不停行黎行去尋找巢穴（要去到頗近地圖先會顯示），浪費時間之餘亦都感覺乏味，希望之後可以透過更新修正。
要清晒呢啲巢穴先可以打通點同點之間既 Fast Travel
至於遊戲既喪屍海，打起上黎的確係有 Feel，只要發出比較大既聲音就會引黎一大堆喪屍，而且只要你比一隻拉住就 GG，係幾刺激。問題係當大量區域都係有一大堆喪屍守住，要係唔發出聲音既情况下逐隻殺就會非常浪費時間同煩厭。
雖然係咁，但部份任務玩家需要面對喪屍潮，邊逃跑邊利用牆內物品擊殺喪屍，呢 Part 的確係幾好玩。
比喪屍追時，係垃圾桶匿埋都係一個唔錯既方法
戰鬥系統方面，各種武器都有分級，基本上越高級越勁（廢話）。遊戲內槍械種類數量並唔多，對於收集控黎講可能係優點黎。不得不提遊戲內有大量消耗性裝備，玩家需要搵資源去修理，但係遊戲內既資源分類其實好少，黎黎去去都係果幾種，但係就有多種功效，玩家唔洗收集幾廿萬樣資源，呢點的確就得幾好。
「廢鐵」呢樣資源已經可以製作、維修大部份道具，唔洗儲幾十種資源，的確做得幾好
做得好既仲有即時合成系統，按 L1 開啟道具環後，去返相應既道具類型就可以作出合成，簡單方便易明。當開啟道具環時遊戲並非暫停，只係令背景所有動作變慢，如果合成動作唔夠快的話依然會被敵人攻擊，如果身處喪屍潮中合成就更覺過癮，值得一讚。
即時合成系統，簡單易明
總結
《Days Gone》以喪屍世界生存遊戲為賣點，雖然好多地方可以做得更好，但係呢類非對戰類型既喪屍世界生存遊戲的確唔多。遊戲水準並唔係話坊間講得咁差，加上咁啱呢期無乜大 Game，遊玩時數又夠長，鐘意求生類型既朋友不妨一試。
VJGamer總編，細細個已經蒲機舖，機齡甚深，熱愛電玩文化。