波蘭獨立遊戲工作室 Blooder Team 最新開發嘅心靈系恐怖 ADV 遊戲《Layers of Fear 2》將由 Gun Media 發行，並於 5 月 28 日登錄於 PC、PS4 以及 Xbox One 平台。

《Layers of Fear 2》係一隻第一視點探索遊戲，前身第一集於 2016 年推出之後大獲好評。唔係講有鬼、亦唔係有喪屍，純粹係係以氣氛、場景、音效三樣元素，去將玩家嘅精神壓力推至最高點。

今次團隊再接再厲推出第二集《Layers of Fear 2》，與上集同樣屬於「精神系恐怖」類遊戲，不過故事設定就係全新劇本。玩家今次嘅身份係一位荷里活演員，你身處豪華郵輪之上，但係船上除左你之外空無一人，有嘅，就只有一個好似導演咁嘅男人，以聲音引導（同埋恐嚇）你。

玩家需要一路行一路尋找情報，到底船上面發生乜野事？點解自己會身處呢條船上？同時，船入面嘅空間極為詭異，就算陳設豪華，但係氛圍會令你唔想停留、空間亦會隨住故事推進，不斷扭曲。

好似有野追住自己，但係你所感受到嘅只有不斷增加嘅壓迫感同埋不安，睇唔到、未知嘅事物，永遠會令人情緒緊張…。

遊戲以第一視點開發，係因為想玩家感受最高投入感，直至感受「全身全靈身處異域空間」嘅不安；不過，因為遊戲並無動作追逐成份，就算係平時玩第一視點苦手嘅玩家，亦可以放心挑戰。

前題係，你嘅大腦要夠堅強。

以下係遊戲宣傳片段：