Netflix 獨佔播放中嘅單元短篇劇集《輕鬆小熊與小薰（リラックマとカオルさん）》，令我喊濕好幾張紙巾。

輕鬆小熊 Rilakkuma，香港慣用譯法係「鬆馳熊」。以「鬆馳熊」系列作為主角嘅劇集，或者，一開始，你會以為係「比小朋友睇架？」或者「女仔先鍾意吧？」。

答案，當然唔係咁樣。雖然驟眼睇呢套動畫的確係「好得意呀～」咁樣；不過，你只要坐低睇第一集，你原本微翹的嘴角，會慢慢緊繃，會不禁咬唇，會不禁沉默。

《輕鬆小熊與小薰》，治癒你的同時，喚起你心底裡很多各種層面的寂寞。

女主角小薰，已到適婚年紀，獨自由家鄉到東京工作，擔任一家細公司嘅普通文員。

事業有前景嗎？顯然沒有，只係平凡一份工；工作不算特別忙碌，只係日復一日，做著一式一樣的工作，沒有你都會有別人，係一份隨時都能夠被其他人取代的、不起眼的工作。

獨居中女無朋友？唔係，小薰有朋友，只不過，一直陪在身邊嘅朋友們，好似都活得比自己好。有已經成家結婚的，也有工作備受公司重用的，亦有事業上早就闖出一番成就的……惟獨係自己，依然站在原地。

是自己不努力嗎？不，小薰從不欠勤，絕不遲到，小薰一板一眼地面對自己的工作；一板一眼地面對自己的生活。

然而，回頭望這一路上的努力，自己卻彷彿依然站在原地，永遠不能成為別人的「優先」，永遠不能成為任何人世界裡面的「焦點」。

短短 13 集嘅動畫裡面，講述小薰一年裡的故事。

一年裡面，所有人都有不斷流動，變化。最明顯嘅，係小薰同公司嘅呢位後輩，由無男朋友、去到聯誼、去到搵到好碼頭（LOL）、然後因為結婚而準備辭職「唔撈啦！」；而小薰能做的，就只有默默祝福。

講到「關係」呢部份，女性觀眾共鳴應該比較多。

小薰曾經好想養貓，好想感受溫暖，想返屋企時有貓等自己門，結果換來後輩一句「與其養貓，不如努力找個男朋友吧」，因為外國一直有「Cat lady」呢個稱呼，好似話有研究指出獨居女子仲要養埋貓嘅，都係有社交障礙嘅人……

唔知，我都有養貓，仲要有兩隻，我唔識答，我睇唔透。不過後輩話「如果前輩而家咁樣仲要養埋貓嘅，你人生真係完架啦噃」，呢句說話令我笑左好耐。

的確係嘅。養埋貓的話，原本已經好宅嘅小薰，應該會變得更宅。

然後，就喺小薰好渴望溫暖、好想養貓嘅時候，鬆馳熊一行人來到了她的家。雖然性格賴皮，但係可愛窩心；雖然成日扭計，但係佢地以小薰為惟一。

佢地唔係卡通人物，佢地係熊；佢地唔只係熊，佢地係屋企人。小薰煮得一手好菜，亦終於有了可以一齊分享、一起吃飯的伴。

就咁睇係好治癒，但其實諗深一層，呢件事真係好寂寞，同枱食飯嘅所有人，包括鄰居小孩時生，大家都係因為寂寞所以聚在一起，互相取暖。

當然可憐人必有其可恨之處，小薰嘅性格太認真，太跟著社會規距走，反而令到佢缺乏個人魅力；正因如此，佢生活苦悶，其實同佢性格都好有關係。

《輕鬆》一劇，係好溫柔嘅作品，裡面嘅人和事，大多都充滿著善意，最多嘅惡意反而係黎自小薰。小薰曾經想趕鬆馳熊佢地出門口去「催姻緣」，亦曾經對於鬆馳熊佢地發出嘅善意「當係老馮」。

經常將「無男朋友呀」「唔夠錢呀」呢啲字眼掛在口邊、對社會生活不滿，一個帶少少花痴又唔樂天嘅女仔，其實又真係幾唔討喜的。

睇到呢度，你可能會話「喂，又話套劇好治癒，點解講啲野咁 Dark？」

所以，講左咁耐，呢套劇嘅感動位係咩？

感動位就係，鬆馳熊佢地無條件地包容你所有優點與缺點、佢地視你為生活最重要嘅存在、佢地會聆聽你事無大小嘅抱怨以及晦氣說話。

佢地對你，始終如一。

如果屋企有養貓（Sorry，我係貓派）嘅人應該會明白嗰種感覺，你寂寞你唔開心，你隻貓會默默陪住你；你喊到鬼死咁大聲，你隻貓會上黎扭摸或者喵你。

呢份帶少少寂寞嘅溫暖，係感動位之一。

第二個感動位，就實在啲。

《輕》全劇所有小物用左將近兩年黎準備，拍攝就用來七個月時間。動畫製作嘅野我唔識，所以我就唔多講獻醜去講咩技術層面嘅事了，我淨係知道劇集用「Stop Motion」方式製作，每件物品，全部手製；每個動作，全部手動。日本有一個名詞叫「職人」，而劇集裡面所有物品、人物嘅製作，上至大場景、下至小小一個茶杯，處處都係「日本職人級手藝」。

將呢份專業、可愛而親切地轉化到大螢幕上，係另一種感動。

劇集中亦有唔少幽默位的，例如最近好興「斷捨離」，而早前 Netflix 亦有個真人節目《怦然心動的人生整理魔法》，搵日本太太近藤麻理惠，不斷幫人執屋，丟垃圾，所有唔要唔用唔好嘅野都「丟掉！通通都丟掉！」丟到過哂火，令「斷捨離」由原本係好 Chill 嘅行為，變成有少少諷刺性嘅字眼。

同樣地喺 Netflix 上面播映嘅《輕鬆小熊》亦有玩呢個梗 LOL：

小薰佢地要搬屋，所以開始丟垃圾，然後見到鬆馳熊有好多件衫（！）

「斷捨離」金句出現了！！

你睇下佢地個樣 LOL

短短十三集、每集十分鐘左右嘅短劇，帶來嘅，除左「好得意」，亦都有好多非常真實嘅都市人生活狀態。飛快地看完第一季，當中有笑容，亦有眼淚，劇集並無任何刻意催淚成份，只不過劇情以及人情都好真，所以輕易引起共鳴。

最後，講多一句：真係好好睇。多謝《輕鬆小熊與小薰》，多謝鬆馳熊，多謝製作團隊。睇完呢套劇，我會再次記得要好好珍惜我所擁有的一切。