「克蘇魯神話」係近年遊戲界熱門題材，而由 Bigben 及 Frogwares 遊戲工作室開發嘅《The Sinking City 沉沒之都》就打正旗號以「克蘇魯」為遊戲核心；最新公開嘅遊玩片段以及片花，都瀰漫住濃厚驚慄不安感，畫面仲非常意識流！相信會係一隻非常耐人尋味而有深度嘅探索遊戲。

《沉》係一隻第三視點解謎遊戲，玩家飾演嘅男主角，係第一次世界大戰嘅退役軍人，而家就位私家偵探。遊戲背景設置喺 1920 年代，位於美國東部麻省嘅架空城市 Oakmont，發生前所未有嘅洪水事件，令到城市入面人心惶惶、甚至陷入瘋狂；當你前往研究事件嘅時候，先慢慢發現水嘅災害背後，有更加恐怖嘅事情…。

官方剛剛於 Youtube 上面發佈左最新實機遊戲片段，章節為「A Delicate Matter（棘手的問題）」，係遊戲比較前期嘅故事段落。

玩家黎到 Oakmont 之後，接到地方望族 Throgmorthon 嘅委託，原來佢早前約左畫家 Herbert Glover 見面，但係對方並無出現，Throgmorthon 覺得事情古怪，所以拜托玩家去追尋。

《沉沒》遊戲嘅難度在於，系統唔會有指引話比你知「下一步要去邊」，無論係搵邊個對話、收集邊啲線索、去邊一個地方，都全部由玩家自己判斷；而收集返黎嘅線索，你仲要加以組織聯想，所以係一個極具挑戰性嘅遊戲。

同埋，既然係克蘇魯，當然就有怪物以及大量觸手 Play，玩家身上雖然有槍，但係子彈並唔係無限的，所以點樣保命都係遊戲一大挑戰。

《The Sinking City 沉沒之都》將於 2019 年 6 月27 日發售，繁體中文及英語對應，平台為 PS4、Xbox One 以及 PC（Epic Store）。最後，如果你仲未睇過，我強烈推薦各位睇以下呢條 Trailer，或者你就會明白，遊戲嘅「力度」係點樣嘅一回事。