唔知大家玩 LEGO 嘅時候有冇試過好似甩牌咁感覺佢有幾多個凸起嘅 Stud？我地可能冇用，但原來對視障兒童唔單只可以拎嚟玩，仲可以用嚟學習、溝通以及融入大眾。

Braille Bricks 呢個計劃本身喺 2011 年就已經同 LEGO Foundation 開始溝通，到兩年前聯同丹麥、巴西、英國同挪威嘅視障人士協會合作，推出第一批嘅測試版本 LEGO Braille Bricks

LEGO Braille Bricks 外表同大家玩開嘅 LEGO 磚唔太大分別，不過佢上面嘅 Stud 就變左排到凸字一樣。當然配合教育用途，磚上面都印有字母或者數字比視力正常嘅家長同教師睇。

暫時 LEGO Braille Bricks 有丹麥、挪威、葡萄牙同英文測試版本，而今年第 3 季就會增加埋德文、西班牙文以及法文版本， LEGO Braille Bricks 將會有 250 件凸字磚，包含該語文版本嘅所有字母以及0至9嘅數目字，2020 年就會正式推出市面發售。

資料來源：LEGO.com