超越父親唔淨只係漫畫主角專利，現實中唔少人既夢想都係可以超越自己父親。而日前係日本舉行既一場《Dragon Ball Fighter Z》電競比賽就正正上演一幕真實既「父子對決」，現場觀眾都為呢場對決而喝采，因為挑戰父親既男孩只有九歲！

呢個比賽係日前於中野 Red Bull Gaming Sphere Tokyo 中每個火曜日都會舉辦既「火曜日對決」，其中一個比賽既項目就係《Dragon Ball Fighter Z》（不過佢地玩既係初中級者限定大會）。而主角之一既 Tsuyoshi 雖然只有九歲，不過已經係呢度既常客。不過今次既比賽同以往有啲唔同，因為平時只係陪 Tsuyoshi 黎既爸爸今次都落埋場玩，而呢位爸爸並唔係咩路人黎，佢係世界最大型格鬥比賽 EVO《Street Fighter V》既入圍選手黎，實力絕對有保證，可能因為咁而加強咗 Tsuyoshi 想跨過父親呢道高牆既諗法。

又咁啱得咁橋，第一場比賽已經係抽到由 Tsuyoshi vs 爸爸，睇見呢個情況其他參賽者都大感興趣，二位評述仲食晒花生，「所有男孩既目標都係超越父親，但係點可能輸比 9歲小朋友」、「呢對父子回程時係火車上到底會有咩感覺」等等。

不過係比賽片段中係睇到 Tsuyoshi 的確有下苦功，絕非亂撳果啲小朋友。佢既攻勢、連技等等全部都非常流暢，最終比賽以 2:1 由 Tsuyoshi 勝出！而勝出後 Tsuyoshi 行過去對爸爸鞠躬感謝，爸爸亦都拍拍佢背，係呢刻超越父親成件事變得好感人！

事後爸爸係佢 Twitter 上面寫返「我輸咗比 Tsuyoshi（喊喊）」，後面再加多句「下次我會贏的」，令人感覺到呢對父子真係關係真係非常之好。唔知香港又會唔會有機會見到咁溫情既「父子對決」畫面呢？