如果一直有睇開我地 LEGO 相關報導朋友，唔會唔記得香港創作者 Ken Lee 以及佢嘅 LEGO 機動海盜船。海盜船3.0嘅時候佢講過休息一排再重新開始創作，但一定會以遊樂場相關嘅設施作為作品主題，呢段日子見住佢不斷對新作去做唔同嘅嚐試同實驗，創作過程仲見得到好多蝦碌事同片喺佢個人作品Facebook Page度睇到，而最終都完成佢嘅全新作品 – Free Fall Tower 1.0
上年年尾有網站漏過風聲會出官方版跳樓機/飛天鞦韆，結果件事當然不了了之。而咁多年嚟亦見世界各地唔少嘅創作者都有挑戰 LEGO 跳樓機嘅呢個想法，當然你 Google 下都會見到作品都幾參差下，有啲係堅垂直下墜式，差在未跌散；有啲不計成本，直頭用埋電腦程式去運作；亦見到有啲係靠拍攝、剪接去嚇下大家。不過 Ken 呢個 Free Fall Tower 1.0 就只係靠一個 LEGO Power Functions M-摩打加上齒輪組嘅配合就可以完美呈現返跳樓機嘅運作。
睇落好似好複雜呢？但佢話比起海盜船，跳樓機嘅機械結構係簡單好多
經過 3 隻海盜船之後，連外部裝飾都簡約左好多，成個跳樓機只係佔 32 x 32 stud，雖然一塊底板就擺得晒，但始終一塊過 32 x 32 質地比較軟同薄，而且要就返齒輪組同摩打組合嘅高度，所以選用 4 塊 16 x 16 底板去做就更穩固、方便
完成版本最高 65 cm，但原來 Ken 話過其實砌幾高都可以，只要調整齒輪比例令佢拉上去嘅時間再耐啲，拉得到上到頂就幾高都掂(當然講緊合理高度啦)
始終用 LEGO 創作，唔用其他素材嘅狀態下製作跳樓機嘅減速、緩撞等等嘅動作係好需要一定嘅技巧，一個唔小心嘅話，啲「乘客」隨時飛埋出嚟。
砌開遊樂場主題嘅 LEGO 產品玩家們又點可以唔撐呢個咁高質素嘅跳樓機？快啲去下面嘅傳送門投一票比佢，等呢個 LEGO 跳樓機可以得到一萬票去得到量產嘅機會啦。
Free Fall Tower LEGO Ideas 傳送門
阿九
打機 - 識少少；玩具 - 識少少；睇戲 - 識少少；動漫 - 識少少.....
買膠、派膠、分享膠！Only The Best Is Good Enough！
Lego Enthusiast //goo.gl/HRnxDW