雖然大家玩 Nintendo Switch 好多時都係面連（面對面打機又真係好開心），但係 Online 玩果陣要用到語音交流就只有用任記手機 App，一係就靠第三方軟件，都幾唔方便。有賴於全球大熱既《Fortnite》技術，打開咗 Nintendo Switch「直接支援遊戲內語音對話」之門，令到 PDP 最新出既呢款手制可以使用呢個功能！
呢款手制叫做 Faceoff Deluxe+，由獲得官方授權既第三方品牌 PDP 製造。呢款手制最特別之處係全球首款內建 3.5mm Headphone Jack 既有線手制，支援玩家於主機上與其他玩家進行直接語音對話，而根據官網解說佢係支援所有遊戲的！（ supports in-game audio for all games and USB-chat for compatible titles.）
可以實現呢個功能，係因為 PDP 用咗由 Vivox 開發既 SDK 音頻技術，而佢地即係開發 NS版《Fortnite》遊戲中既語音聊天功能既工作室。
除咗最主要既語音聊天功能外，Faceoff Deluxe+ 亦都有音量控制、自定按鍵以及可更換外殼等功能，而手制外貌同任天堂官方隻 Pro 手制極為相似，估計用起上黎都唔會衰得去邊。 Faceoff Deluxe+ 暫時尚未開賣，預計會係 5月正式接受預定，售價 USD 24.99，有紅、紫二隻顏色選擇，有興趣既朋友記得 Mark 定時間去訂啦！
動漫電玩宅，極愛金田一系列，擅長動作及策略遊戲