鬼恐怖，喪屍都恐怖，不過其實人最深嘅恐懼就係黎自己嘅內心！荷蘭獨立遊戲工作室 Creazn Studio 就睇中左呢一點，開發出全新原創精神恐怖遊戲《DOLLHOUSE》，遊戲由 SOEDESCO 發行，對應平台為 Steam（PC）以及 PS4，預計 2019 年 5 月 24 日發售。

《DOLLHOUSE》係一個第一視點探索遊戲，遊戲走黑色電影（Film Noir）風格，無論故事抑或畫面構成，都瀰漫住淡淡虛無以及頹廢感。玩家飾演嘅女主角 Marie 係一位失去記憶嘅名偵探，而為左搵返自己嘅記憶，佢必須要進入惡夢裡面尋找線索。

但係，呢個惡夢，其實正正係 Marie 心中埋藏而久嘅秘密衍生出黎嘅夢魘。

遊戲每次嘅迷宮路線都係隨意生成，加上玩家於遊戲中嘅選項都會影響故事發展，所以每次玩《DOLLHOUSE》都會有唔同感受同經歷；而 Marie 可以學習到嘅技能達到 40 種以上，玩家就要利用呢啲能力去脫出呢間恐怖洋娃娃屋。

遊戲除左單機模式，仲有高至 14 人嘅對戰模式，可以將自己化身為朋友惡夢裡面嘅敵人。