打《隻狼》打到想棄 Game 的朋友，唔駛舉手，我明（喂）

不過，如果淨係將對《隻狼》嘅重點擺喺遊戲難度上面，咁就太可惜了，不要忘記遊戲乃係出自 FromSoftware 以及宮崎英高先生手筆，每個關卡、情節故事，其實都蘊含住滿滿惡意與隱喻。

今次同大家講下「破戒僧」呢個中期頭目。

事先說明，本文有劇透！

有劇透！

有劇透啊啊啊！

準備好了的朋友請繼續往下閱讀，以下為本人對故事嘅個人理解，如讀者朋友們有其他想法，歡迎留言討論！

喺各大遊戲展裡面作為 Demo 比公眾試玩嘅頭目「破戒僧」，其實係《隻狼》中期嘅頭目，地點為「源之宮」。玩家抹香進入花橋之後，黎到「源之宮」，應該會心生疑問：個場景好靚點解會由戰國風變成平安時代風格？

先同大家組織一下故事背景：

《隻狼》故事一共有四個結局，如果四個結局玩哂，你大概會明白狼的任務唔止淨係要打敗葦名弘一郎，而係以下幾種可能性：

（1）保住龍胤不落葦名之手，或
（2）要達成御子嘅願望：斬斷龍胤，或
（3）將「龍胤」之力歸還予「龍」之出處，亦即係遊戲中名為「龍之歸還」嘅結局路線。

遊戲中四種不死嘅力量分別為龍胤之力、「源之宮」嘅水、不死蟲、以及「變若水」，四種力量都係源自源之宮的「櫻龍」，而「櫻龍」降臨嘅年代，正正為戰國前嘅平安時代，所以「源之宮」嘅景觀以及敵人都係走平安風。

「源之宮」裡的櫻花永不枯萎

咁「破戒僧」又關咩事呢？點解會作為「源之宮」地圖嘅其中一位頭目？

如果你打嬴左佢，你或者會留意到：根據遊戲內容說明，破戒僧原來正正就係八百比丘尼！八百比丘尼係平安時代著名嘅「不死人」，當然呢一點有神話亦有都市傳說嘅成份，不過，重點係……

即係話，其實「破戒僧」是女的！是女的！是女的！很重要所以要說三次！

圖片來自網路

日本神話裡面，最常有嘅說法，就係少女誤食人魚肉，因此飽受長生不死之苦，後來佢藉由呢份不死之力，成為僧侶 「八百比丘尼」喺日本國內廣做善事，最後佢深居某洞穴，在洞外廣植茶花，並對外宣稱「茶花枯萎之時，就係自己圓寂之日」；遺憾地，不死的「八百比丘尼」連種嘅花都唔會枯萎，然而從此再無人知道佢嘅行蹤。

相傳佢圓寂嘅地點為寺廟「空印寺」，地點為福井縣小浜市； 而「空印寺」旁邊，就有「八百比丘尼洞」。

「源之宮」裡面有永不枯萎的櫻花，伴著長生不死的「破戒僧」，或者都算係一種意味上嘅借鑑。

圖片來自網路：八百比丘尼洞

不過，宮崎英高所採用嘅「八百比丘尼」故事，似乎就比較偏向日本奇幻大師夢枕貘筆下小說《陰陽師》嘅版本，畢竟正式傳說裡面嘅「八百比丘尼」故事太正路了。

小說《陰陽師》裡面嘅「八百比丘尼」，係陰陽師安倍晴明嘅第一個女人，然而身為僧侶嘅「八百比丘尼」，並無好好遵守戒律，反而縱情色慾，大量與所有男子交歡；然而，男子們喺不老不死嘅「八百比丘尼」身體裡面注入嘅生命，因為慾念而邪化，累積之下成為巨型妖蛇。

小說版示意圖

喺呢個版本入面，安倍晴明與源博雅合力將「八百比丘尼」身體裡「妖蛇」揪出、斬斷，亦因此了結「八百比丘尼」原定「長生不死」嘅命運；呢個情節，就同遊戲中《隻狼》中狼最後從「破戒僧」體內揪出不死蟲、將其斬斷嘅意味極為相似！

當然，以上理解純屬個人推測，我亦相信宮崎大叔應該唔會直白向玩家交代故事人物嘅真正創作意念（這位大叔嘅心眼真的好黑！）我本身有追看《陰陽師》系列小說，所以知道遊戲對「八百比丘尼」有如此相似嘅安排，只能夠講一句我服了～。

《隻狼》故事仲有好多吸引而神祕嘅地方，如有機會，再撰文與大家討論分享喔！