騰訊強勢就係人都知，不過你又點估到連《牧場物語》都拎到正式授權（錢真係萬能）！今日 Marvelous 正式宣布，同中國騰訊簽訂授權契約，將會推出旗下知名遊戲《牧場物語》手機版，相信唔洗好耐大家就可以邊行邊養牛！

《牧場物語》手機版將會同騰訊合作

《牧場物語》於 1996 年首次係超級任天堂平台推出，係遊戲內玩家將扮演牧場主人，體驗牧場生活。玩家除咗要種植農作物、飼養各種家畜外，仲可以伐木釣魚、挖礦採集、結婚生仔等等，加上遊戲風格極為可愛，推出後每代都受到大量玩家喜愛同好評。

至於《牧場物語》手機版，遊戲相關既音樂、CG 等內容將會由 Marvelous 提供，基本上已經肯定唔會點走樣。而騰訊就主要負責開發、下載同營運，不過實際內容都係要等官方公布，到底會唔會好似騰訊最近另一隻大熱手機遊戲《聖鬥士星矢：覺醒》咁，充滿住滿滿既課金元素呢？（隻牛 Free 比你，不過啲飼料就麻煩課金……）

其實之前都出過一隻叫做《牧場物語：記憶的種子》，雖然整體都叫唔錯，不過可玩既內容略嫌單薄。由騰訊出品的話內容相信就唔洗點擔心，相信都值得期待。（唔好忘記仲有隻叫做《哆啦 A 夢 牧場物語》都係今年推出）