科幻冒險型遊戲大家就玩得多，但係又有無諗過扮太空站？上年公布既新類型科幻驚慄遊戲《Observation》係較早時段有新片發布，遊戲所營造既環境極有經典電影《2001太空漫遊》既味道，不過玩家並唔係扮演船員，而家扮演人工智能「HAL 9000」，掌控全員命運！
《Observation》屬於科幻驚慄遊戲，玩家會扮演負責控制整個宇宙太空站「Observation」既人工智能「S.A.M.」（全寫：Station AI, Systems Administration and Maintenance），遊戲舞台當然亦都係圍繞住整個太空站啦。遊戲中太空站發生咗不明既事故，燈光瘋狂閃爍、警報亦都響起，而唯一可聯繫既成員就得返駐站醫生愛瑪（Dr. Emma Fisher），而佢正被困於一個氣閘內，玩家第一個任務就係幫佢打開度門，救佢出黎。
遊戲基本玩法係透過切換太空站內無數既監視鏡頭，幫助愛瑪醫生去解決謎題，並且逐步搵出發生緊咩事。本作最特別既地方在於思考既方式，例如係遊戲初期，你要幫自己既系統去做檢查，然後再話比愛瑪聽有咩功能係運作緊，又係唔係屬於正常運作狀態。係呢個時候其中一樣要做既事情就係用太空站外部攝影機，去視察周圍有無受損既地方，以及尋求線索，再選擇點同愛瑪做報告。
雖然遊戲主軸係幫助愛瑪去探索解謎，不過我地有睇開戲既都知道人工智能呢味野多數都係奸架！加上 PlayStation《Observation》既遊戲分類係屬於冒險 / 驚慄 / 模擬，成件事更可疑！ 唔好忘記係人工智能既角度，「梗係要係你 Reboot 我之前殺晒你地！」以到底可唔可以扮幫人然後逐步推佢去死，可以的話就令人非常期待啦。
《Observation》預計於 5 月 21 日正式發售，對應平台 PS4。
VJGamer總編，細細個已經蒲機舖，機齡甚深，熱愛電玩文化。