預計將於今年內推出嘅《伊蘇 IX：Monstrum Nox（YS 9）》自公佈以來一直十分神秘，官網亦都只有極少資料，令到一眾粉絲（如我）既期待又坐立不安；不過遊戲於剛剛完結嘅「電擊遊戲節 2019」終於首度展示遊戲畫面！

大家熟悉嘅紅髮主角 Adol，喺今集《伊蘇 IX》嘅歲數為 24 歲，所以故事並唔係承接上集《伊蘇 VIII -Lacrimosa of DANA-》（遊戲時 Adol 為 21 歲），而係較貼近《伊蘇 VII 阿爾塔戈的五大龍》嘅時代。

故事世界為一個為名 Baldeux 嘅「監獄都市」，呢個地方嘅住民大多擁有超能力，亦因如此，今集嘅角色行動以及穿梭地圖嘅形態亦有好多唔同變化，例如可以飛！

早前我地訪問 Falcom 近藤社長時，佢曾表示「團隊好努力地為《伊蘇》嘅遊戲系統作出改良」；雖然今次公開試玩片段只係見到兩位角色奔牆以及飛翔嘅行走畫面，但係，相比《軌跡》系列以及《伊蘇 VIII》只能夠沿著既定路線行走嘅玩法，今集似乎更有「無縫」及「半開放世界」嘅自由感。

新角色喺牆到行會留低肉球印，好可愛

呢個「監獄都市」佔左成個遊戲地圖約 40～50％ 大小，有分成唔同區域，包括核心區以及貧民區；同埋今集首次採用「3D」構成為世界建立高度及規模，聽落已經好想玩！

至於主角 Adol 亦都係片段中短暫出現，戰鬥方式依然靈活，同埋新增左一種可以即時飛衝嘅元素，有少少似《FFXV》Noctis 王子成日飛黎飛去衝刺嗰一招。

淨講好抽象，我地一齊去片：

不過，官方亦暗示今次嘅劇本會係「悲傷嘅故事」，又的確，官網上面瀰漫住嘅氛圍，亦唔係啲咩開心嘅感覺；Falcom 寫劇本一向出色，所以無論你係唔係《伊蘇》Fans，如果你喜愛玩 RPG，今集都絕對係你不容錯過嘅遊戲。