Fans 要數好玩嘅《ONE PIECE》主題遊戲，來來去去應該都會講《海賊無双》系列，而 BANDAI NAMCO 出品嘅《ONE PIECE》主題遊戲真係冇邊隻大家玩得落。直到大家見到《ONE PIECE World Seeker》呢隻作品嘅預告，加上之前嘅《NARUTO TO BORUTO 新忍出擊》、《Dragon Ball Xenoverse 龍珠 異戰》系列，令到好多 Fans 都覺得有返少少嘅希望喺 BANDAI NAMCO 身上。

雖然遊戲中有大量《One Piece》新舊角色出場，就連作者尾田榮一郎喺漫畫中經常出現嘅彩蛋人物「熊貓人」都會喺遊戲中出現，不過論可使用角色就得路飛一個，加上除左過場動畫有完整配音，其他故事情節嘅配音都只係”吓？！””哦？！””哈哈”之類嘅單字，感覺上就唔太夠喉。

成個地圖收埋好多個「熊貓人」，不過發現佢又唔會有咩獎勵，真係純粹 Fans 開心下

故事主軸發生喺全新嘅原創海島「監獄島」，地圖算係一啲都唔細，而且每個地點都有唔同特色場景設計，不過 NPC 同玩家除左對話之外就冇其他互動嘅地方。而劇情你當一套《One Piece》嘅劇場版去睇嘅話係尚算收貨，而且故事有啲啲似 2012 年嘅《ONE PIECE FILM Z》，但當然冇《Z》咁多手下角色同捨身熱血啦。如果真係將主線劇情變做動畫，我諗要講要打大概個零鐘乜都搞掂晒。

講到遊戲性，大家唔好當個開放式世界對呢隻遊戲有好大幫助，我可以肯定答你係冇架！頭先講左 NPC 只係主要同你對話，而如果你係要搵同任務相關嘅 NPC，基本上見到行行走走嘅一定唔係，再加埋路飛有個好似《刺客教條》入面鷹眼嘅見聞色霸氣，搵任務也好、道具也好又或者 NPC 都好，其實冇大難度。武裝色霸氣就真係用都冇用過，因為敵人嘅攻擊反應奇高而且連貫性亦極奇突出，武裝色好多嘅技能都係儲力攻擊，我諗大家儲得嚟都應該比人打低埋……

一次要打8-9個飛行敵人，你都咪話唔頭痛

咁講左咁耐其實有咩值得玩落去？《ONE PIECE World Seeker》其實係一隻普通嘅動作遊戲，仲要帶住少少我地 PS1 或者九十年代街機啱啱興起嘅立體動作遊戲感覺，啫係類似《Fighting Force》、《Gekido》之類，而佢最大分別就係路飛可以有技能樹加技加自身能力。而且一入左同任務相關嘅戰鬥，你係會限喺範圍內，出左範圍就當玩家任務失敗。玩家攻擊嘅動作亦有相當嘅限制，你唔好諗住好似《無双》咁可以隨時收招、閃避或者跳走，而且敵人被打低倒地係有無敵時間，你唔用氣出技打嘅話係唔可以喺佢倒地後加傷害。成隻 Game 喺打鬥上係有種舊年代嘅遊戲魔性喺入面，你明明覺得故事、角色、技能、遊戲性等等都唔係叫做高質素之作，但佢呢種老老土土嘅質感又令到我 Keep 住想打完佢為止。

奸角嚟講，佢都算冇乜魅力

總括嚟講如果《ONE PIECE World Seeker》係一個試作型作品或者只係賣百零二百蚊嘅，我相信 Fans 係會受落，你諗下出隻劇場版 Blu-ray 碟都係咁上下價錢，你可以做路飛走嚟走去都幾過癮！但依家燒鵝價錢出個蔗渣嘅味道，如果仲有 DLC 要加錢先玩到嘅就真係要慎重考慮 (除非你出返頂上決戰劇情去以呢個模式玩一次，可能會比多次機會嘅)。

福利有啲啲咁多，不過值唔值得咁而加分就……(好彩唔比錄影但可以Cap到圖)