每次 Form Software 出 Game 都會引起大量機迷既注意，例如每次既《Dark Soul》系列咁，然後好多人聽人講話好好玩，買完返去發現太難玩然後棄 Game。今次既《隻狼：暗影雙死》被喻為該廠出品既遊戲入面最難玩既一隻，咁到底應唔應該入手自虐？

遊戲畫面果類廢話就唔講啦，主要講系統。

《隻狼：暗影雙死》同其他兄弟作有好大既分別，以往玩《Dark Soul》或者《Bloodborne》都好，打唔贏可以刷下小怪累積經驗升級再打過；仲係打唔贏的話就可以 Call 朋友幫手，實行江湖規矩「人多蝦人少」。不過黎到《隻狼》就無呢支歌仔唱，既無得升 LV 亦無得 Call 人幫手，卡關的話基本上只有再磨練自己技術一途。

今集叫得做「隻狼」，真係得隻身一人

遊戲玩法同《Dark Soul》、《BloodBorne》系列唔同，普通攻擊鍵只有 R1，撳實 R1 就會變為突刺，隨住故事推進可以學到唔同既流派斬擊技。係《隻狼：暗影雙死》入面，你劍術點華麗都好，要擊殺敵人都係需要用「忍殺」呢個動作，簡單講即係背刺暗殺，如果敵方無發現你既情況下，空中跳入同樣可以施展，當然正面對決下打到敵人「擋格值」滿咗都可以施展。遊戲內大部份中頭目或精英怪都需要使用二次「忍殺」先可以擊倒。

咁「擋格值」又咩黎？

當敵人攻擊時，只要玩家把握時機，係差唔多被擊中前使用 L1（擋格），成功的話會出現紅色火光，會大增敵人既「擋格值」，呢行屬於敵人既「擋格值」會係畫面正上方顯示（小怪就會係血條下顯示）。需要注意一點，如果敵人係頭目級別的話，一段時間無攻擊「擋格值」就會扣返。而敵人既「血條」係本作叫「軀幹」，「軀幹」值越低「擋格值」就回復得越慢。

屬於敵人既「擋格值」會係畫面正上方顯示；玩家「擋格值」則顯示於正下方

敵人有「擋格值」，玩家同樣都有「擋格值」。如果唔係適當時間格擋對方攻擊，就會變成自身增加「擋格值」，所以點樣捕捉敵人攻擊節奏、時機就變得非常重要。當然你都可以玩閃避流，逐刀逐刀咁去劈敵人，隨住削減「軀幹」，「擋格值」都會慢慢上升，不過唔知劈到何年何月咁解。

擋完之後有空位的話就要用「回斬」，一來一回格劍勁好 Feel

有時敵人會出現「危」字，代表該攻擊不能擋格

就咁睇好似好複雜，不過玩起上黎係非常之爽快，而且因為贏得既都係都靠自己實力取勝，箇中既快感真係特別美味。當然除咗打之外，遊戲中同樣有成長要素，不過就唔係話升自身 LV 呢類野，而係可以習得唔同流派既技能，令戰鬥技巧更多元。不得不提既係主角身上忍義手可以安裝各種多姿多采既「忍具」，呢啲「忍具」應用係唔同既敵人身上都會有特別效果，可以自己慢慢試又或者做返忍者咁去「偷聽」！

有時會有得「偷聽」，成日都會透露重要情報，最直接既係之後隻王會怕咩咁

遊戲基本玩法就好簡單，不過對戰技巧就好花心思。如果跟正常路線第一隻正式既頭目「幻之阿蝶」將會係玩家既惡夢，速度極快又有遠攻，仲識得用幻術！但係佢全部招式都有跡可尋而且有破解方式，搵出致勝方法就係呢隻遊戲一大趣味！（最惡毒係隻隻頭目級角色都有自己一套打法）

提示：善用柱同埋忍具「手裡劍」

識打佢其實唔難

另一隻頭目級敵人，具體點打就唔講啦，提示係打佢有件「忍具」好有用

當然呢隻遊戲既難度的確係高既，玩家雖然可以用道具升體力，但係呢個道具多數都係打敗有人名既強敵先得到，仲要儲齊四粒先升一格！而升攻擊力就更加變態，打贏「幻之阿蝶」呢類頭目級角色後，就會得到「交戰殘滓」呢樣野，要有呢樣野先可以加攻擊力……即係話你打唔贏唔緊要，只要你贏到佢就有得 Upgrade 架啦！成件事好變態……

打完先有……唔該晒

「忍具」都有得升級，不過我就唔係好感覺到分別

流派技能都有得升級，可以豐富戰鬥手段

不過每次死亡，經驗值同金錢都會扣一半……偶然會有「冥佑」出現，但係死得越多「冥佑」出現機率就越低……

講完系統講下故事，今次故事簡單講就係有人要捉王子（因為王子身上既某啲野），然後主角就保護皇子失敗，跟住仲比人斬埋隻手添，之後就有人幫佢裝咗隻忍義手，有返隻手咪再次踏上旅途去救王子。

我地編輯部已經有人接近爆機，據聞今次故事無其他作品咁「Dark」，雖然有部份支線未解到，不過整體都幾大路，至於 Form Software 喜愛既伏線係本作依然存在，隨遊戲發展會慢慢揭開「王子」身上既謎之力真面目。

都有 NPC 講故仔，不過就唔算「Dark」

總括黎講，成隻遊戲水準係極高，有力問鼎今年既 Game of Year，不過佢既難度應該都係 Game of Year。自問鐘意挑戰，對自己技術有信心既絕對唔難夠錯過！

《隻狼：暗影雙死》於 3 月 22 日正式推出，對應平台 PS4 / Xbox One / PC。