隻狼：暗影雙死 可以話係今年最優秀動作遊戲，不過佢既難度亦都出奇地高，要爆機唔係咁簡單，我地編輯部早幾日已經拎到遊戲，所以特別做返篇新手入門需知俾大家！

呢隻唔係無雙 請善用彈反

Form Software 遊戲以高難度見稱，絕對唔係無雙無腦劈，講求大家既眼力同反應。

隻狼最主要系統就係彈反，類似《Dark Soul》、既盾反、《BloodBorne》槍反。即係玩家要係敵方攻擊差唔多打中你時按 L1 擋格，成功的話就可以增加對方擋格值，只要對方擋格值滿左就可以施展忍殺。

當然，你自己都會有呢行擋格值，你俾人打爆的話同樣會有超大硬值，所以唔好撳實 L1 死擋。

擋完之後有空位的話就要用「回斬」，一來一回格劍勁好 Feel

忍殺成功！

補血次數有得升

遊戲內並無等級系統，不過就仍然有得升體力同攻擊力。

同以往系列一樣，玩家會有個個「傷藥葫蘆」跟身，初始淨係用得一次，玩家只要執到種子就可以返去揾今集防火女麻英加大使用次數。而體力就要集齊四粒「散落念珠」後可提升一次，通常於擊敗強敵後得到。

種子極為珍貴，一周目差唔多完我都淨係搵得幾粒

集齊四粒就可以加體力上限，一般黎講都要擊敗強敵先會有，不過都有 NPC 有賣……一粒咁多

升級技能令動作更豐富

雖然無得升LV，招式都係有得升。拎到義手之後就會集得流派招式，而每個流派都會有對應既技能樹，頂端會有該流派奧義。不過唔好諗住有得升技就會好易打，其實啲技大多數都係等你多啲手段咁解，整體核心都係彈反上面，所以努力啲練技術啦！

而升技就要用到經驗值，呢樣就可以刷的，算係 Form Software 既小小仁慈。

遊戲內有幾個流派，每次只可以選擇一個流派招式，所以唔好貪得意呢個流派學一招，果個流派學一招咁

呢度強烈推薦大家先升「護命呼吸‧陽」，因為補血手段真係勁少，學左呢招之後容錯率大增

強敵應智取

本作同《Dark Soul》、《BloodBorne》有好大分別，會成日係地圖見到有二格血既人，呢類人一定係有人名強敵黎，而且佢地每隻都有自己特性同攻擊方法，不過就有一個共通點……就係好勁！

對手咁勁，我地當然要智取啦！大部分強敵都會有死角，我地可以先潛到附近地點，只要佢見你唔到就可以施展忍殺，咁就可以先削對方一格血，大大減輕對决難度。

遊戲中非 Boss 強敵，個人排名呢隻係三甲，佢長槍攻擊範圍超廣，而且極大力，基本上你擋 1-2 下已經爆擋格值。

係左邊山邊小路可以繞去佢後面，先忍殺一次，之後對戰會輕鬆好多

另一隻三甲敵人，仲未諗到點打佢，所以 Skip 咗先

天守閣守護者「拔刀齋」，擁有全遊戲最高攻擊發動速度，而且就算擋住拔刀攻擊都會扣血，非常痴線！（呢隻唔夠打的話同樣有條小路逃走，唔一定要打的）

善用義手忍具

隨遊戲推進，玩家會得到唔同既忍具，好多忍具都非常好用。

好似前期就有既「螺旋手裡劍」，當面對有一堆敵人守住點，用「螺旋手裡劍」引小怪出黎係極之有用既手段，而且唔少忍具打王有奇效！前期超強敵「幻之阿蝶」，善用忍具「螺旋手裡劍」的話，好多位都有得執雞。另外「爆竹」對動物類敵人非常有效，面對動物系敵人記得使用。

「火吹箭」都算唔錯，打赤鬼非常有效，配合埋「油」使用更佳

不過部份忍具使用方法都幾迷，好似呢件忍具我就完全唔知點用

忍具仲有得 Upgrade，需要用到「鐵屑」同錢

閃避方式有二種

係隻狼入面，閃避分為二種方式，O 制 + 方向閃避，同 X 制跳躍。

閃避同大家玩慣既動作遊戲類似，不過要注意敵人攻擊角度同範圍。例如左斬向右既攻擊，如果你閃右就未必安全，反而閃向左邊就相對穩陣。

跳躍就主要係避開下段攻擊，睇啱時間避的話仲可以偷到幾刀，所以有時閃避唔到既招，又似係打下段既攻擊，試用跳躍啦！

逃跑堅有用兼唔可恥

今次作品係強烈鼓勵人用潛行暗殺（咁你好少話會見到忍者衝入敵陣開無雙既），但總會有事敗既時候，無信心一挑多的話就掉頭走啦！過一陣揾你唔到就會返原位，用呢個方法就可以逐隻輕鬆殺！

《隻狼：暗影雙死》於 3月22日正式推出，對應平台 PS4 / Xbox One / PC。