＜本感想文劇透注意＞

於 2019 年 3 月 8 日推出嘅《Devil May Cry 5》相信係唔少朋友最近嘅單機之選，作為著名系列作《DMC》嘅第五集作品，喺遊戲釋出資訊話「今集會有得用返但丁」之後都令唔少玩家期待，因為好多《DMC》Fans 同網友早前都話「頭三集其實最好玩」，亦都有唔少聲音話「Nero 作為主角唔夠 Charm」。

上集嘅事，我唔評論，不過《DMC 5》，我係越玩越高興的。

喺早前試玩 Demo 時，一來淨係有得用 Nero，二來學到嘅戰鬥技亦唔多，所以感覺有點單調；到正式開 Game，交替使用 Nero 以及 V 兩個角色，趣味開始黎，但係劇情上面都略嫌累贅。

直至去到遊戲中段，V 搵返把 Sparda 同埋開始甩皮（喂），然後 Dante 出埋場之後，《DMC 5》其實先至正式開始。

戰鬥同埋連擊係《DMC》嘅一大遊戲重點，而遊戲中三位角色嘅特性以及戰鬥風格都非常唔同，又，三位角色嘅戰鬥風格，其實亦正正反映左佢地嘅性格。

Nero 急進，單純，所以三位角色入面，佢嘅招式最衝最快；而 V，嚴格黎講佢唔算係一個完整嘅「人」，所以要靠佢嘅使魔 Shadow、Griffon 及 Nightmare 進行主力攻擊，同時每一步都步步為營，佢嘅戰鬥與其話睇住自己點出招，倒不如話係 Keep 住閃避等住執死雞……因為佢根本無得揀。

講起 V 其實我幾鍾意呢個角色，一來 V 喺遊戲入面係帶住最多劇情嘅人物，佢嘅身體衰弱亦都暗示劇情進入緊關鍵部份；二來隻衰雀（或者其他人口中嘅 Chicken）Griffon 成日吐糟同埋講廢話真係好可愛，作為惡魔，佢都真係一隻非常有血有肉兼有人情味嘅惡魔，所以最後佢退場嘅結局，令我好唔開心 orz

無錯，成隻 Game 令我最在意就係 Griffon 嘅結局，重點好錯。

不過，真正令《DMC 5》開始嘅，係中段 Dante 出場。

Dante 嘅攻擊內容係最豐富亦係最難用得好嘅，有格鬥拳套、有魔劍、有雙截棍，連槍都有四種；加上佢有魔人化形態轉變，玩到佢真正出場時，我再次大開眼界。

唔係話 Nero 唔好用，而係 Dante 嘅力度同埋氣場真係太搶眼，去到後期仲有飛帽玩「帽子戲法」向 Michael Jackson 致敬又係一個驚喜，雖然外國就話呢個致敬即係認同 MJ 攣童嘅傳聞，但係我覺得，咁 MJ 對音樂嘅貢獻，相信無人會否定，至少我喺遊戲入面見到 Dante 跳 Moonwalk 我係好開心的，《DMC 5》嘅動畫真係整得太靚。

不過，Dante 嘅出場令到 Nero 嘅定位變得好尷尬。

Nero 前期受 V 所托去救打 Urizen 第一次打唔嬴嘅 Dante。點知，去到都未熱身，就比 Urizen 打飛，然後要 Dante 一個人頂住比 V 帶住 Nero 走佬。

到 Nero 再次上陣去嘗試救多次 Dante，V 又先佢一步搵到 Dante 所在，跟住 Dante 仲要話「Nero 仔呀你嬴唔到架，你走吧啦，叔自己搞得掂，你返屋企啦。」

我望住 Nero 一臉錯愕嘅表情，陰公，咁 Nero 一路上咁多關卡打餐死，到底係為左乜？

然後，開始懷疑人生嘅 Nero，無啦啦睇住戰友 V 同 Urizen 結合（？？？）返變成 Vergil，呢一段劇情相信唔止係佢，大家都應該睇到「WTF」……雖然下一秒又會好快覺得「Vergil 真係好型（心）」 所以默默接受左呢個充滿犯駁嘅劇情安排。

不過，對於 Nero 黎講，被 Dante（充滿憐愛地）當累贅、目送朋友 V 消失，再知道眼前呢個「V+Urizen」八神歸位後嘅 Vergil 居然係自己老竇……老實講，的確除左「我該怎麼辦」之外，我都唔知講咩好。

官方好努力地將 Nero 變成主角，但係劇情上面就只係將佢變成飛鳥真。就算我對 Nero 唔算好有愛，都真係好想拍拍佢膊頭講句「I know that feel bro」。

老竇仲要話唔 Care 你，你可以點？

當然，劇情後尾就有講返，呢一戰係屬於 Dante 同 Vergil 之間嘅兄弟對決，但係 Nero 就覺得「我打老竇」同「你打大佬」其實本質上根本一樣，然後呢場原本為左保護地球嘅驅魔之戰，突然變得充滿溫情嘅屋企人戰鬥。

唔知係咪想強調「Nero 都係主角」，遊戲最後將佢都魔人化，仲成功阻止 Dante VS Vergil 嘅必死之戰，結果仲令佢地兩兄弟突然好有默契咁去趕妖除魔。

如果呢個係 RPG 遊戲，呢種劇情安排一定會玩到人「黑人問號到永遠」；不過，正因為佢係《DMC》，佢劇情犯駁，但係佢型呀；佢前言唔對後語，但係……但係……佢型吖嘛！LOL

「只要你接受了這種設定」，《DMC 5》係一隻做得非常唔錯嘅動作遊戲。

今次我地玩嘅行版《DMC 5》同時可以選擇英語及日文配音，不過，唔知係咪因為遊戲主打海外向嘅緣故，英文配音做得比日文真係出色太多，連我呢個日本聲優控面對住石川界人（Nero）、森川智之（Dante）以及內山昂輝（V）呢三位我頗有好感嘅聲優，我都喺遊戲中段默默轉返英文語音……。

原因，有二。

一，係口型問題。就算你揀日文語音，角色講野嘅口型，都係講緊英文嘅口型。

二，係翻譯問題。遊戲裡面其實有好多好 Chill 嘅對白，唔知一開始係咪以英文作為寫作原文？所以日文對白聽落去頗為累贅，加上唔知點解，日文語音同日文字幕並唔一致！！點解會咁！！如果你同我一樣，都係打機首選日語系統＋語音嘅話，《DMC 5》嘅日文部份會令到你好頭痛。

不過綜觀黎講，今集《DMC 5》都值得一玩，就算你唔係《DMC》Fans 或者以前無玩過《DMC》都唔緊要，遊戲 Menu 有得揀返以前嘅故事介紹黎睇。

雖然今集《DMC 5》神士福利唔多，Trish 以及 Lady 都只係曇花一現，唔係操作角色之餘，戲份亦唔多，不過我知道唔少女玩家就非常鍾意今集遊戲……（笑）同埋，如果你追求爽快攻擊感，同埋想打機打到覺得自己真係好似主角們咁型棍嘅話，《DMC 5》無論喺畫面、動作、音效上面都係極級炫麗享受，絕對係單機遊戲嘅唔錯選擇。

重申：只要你接受了劇情是這樣的設定……LOL