無論咩年代，大混戰遊戲一直都好受歡迎，下個月又會有一隻混戰遊戲上市，今次就主打迷你坦克大戰。鍾意一班朋友打內戰既，呢隻《Tiny Tanks》應該啱晒你玩！
《Tiny Tanks》由 LeadFollow Games 開發，係一款迷你坦克對戰遊戲，遊戲最大容許八名玩家對戰。
遊戲特別既地方係整個地圖玩家都係可以完全破壞，亦即係話殺敵既方式唔係淨係開炮打中人就算，而係可以利用地形作出攻擊。例如炸飛個樓台，等啲殘骸跌返落黎責死人；又或者打爆個地面等人跌落街死等等，殺敵方式極多元化。
修改器好過癮！
另外每位玩家都可以自訂自己既坦克，遊戲推出時已經會有多達三十五個部件，除咗外觀上有分別之外，性能上亦有差異，可以慢慢砌隻自己既坦克。每場遊戲亦都可以設定修改器去改變遊戲規則，例如開炮射中敵人會彈開；又或者係開炮時自己會彈後咁，次次唔同款款新鮮！
遊戲亦有提供地圖編輯器、大量預製地圖、修改器編輯、大量遊戲模式等等，基本上係抵食夾大件！
《Tiny Tanks》將於 4 月 11 日發售，對應平台為 PC。（希望出埋係 PS4 同 NS 啦）
動漫電玩宅，極愛金田一系列，擅長動作及策略遊戲