想當年 Data East 呢間廠成日出埋晒啲好有創意既遊戲，《Windjammers》呢隻飛碟對戰遊戲就係其中之一，果陣係機舖都唔少人玩。事隔廿五年本作終於公布出續集，最快係年尾有得玩，仲有埋新片睇！

《Windjammers》係 1994 年係街機同 NEOGEO 上推出，之前就被取得遊戲版權既法國工作室 DotEmu 係 2017 年推出重製版《Windjammers》既 PS4 / PSVita 版本。作為正式續作既《Windjammers 2》同樣由 DotEmu 開發，遊玩方式同上集大同小異，目的都係要將飛碟掉入對方龍門，高分者勝。

呢隻遊戲特別既地方係佢其實唔太似玩緊飛碟，比較似遊樂中心常見既氣墊球（即係張枱會噴氣，打白色塊野果隻 Game），都係接住對方射出既球，儲力打返過去。另外每位角色都有自己必殺技，玩起上黎係幾爽快，亦都簡單易上手，同朋友玩一流！

《Windjammers 2》預計於 2019 年發售，對應平台為 Nintendo Switch / PC。