喪屍 Game 不嬲都有一種特別既魔力引人去玩，多人合作打喪屍既遊戲就更為吸引，當中尤以《Left 4 Dead》最具代表性，今時今日你落網吧都仲會見到有人組隊玩。唔知係咪睇到 4 月推出既多人打喪屍 Game《World War Z》極受注目，有望超越早登神枱既《Left 4 Dead》，作為原開發團隊既  Turtle Rock 工作室正式發表新作《Back 4 Blood》！

根據官方公告，Turtle Rock 今次並唔係夥拍 Valve，而係同華納兄弟互動娛樂合作。相隔十年，Turtle Rock 選擇返佢地最叻既題材：多人連線喪屍射擊。

雖然暫時資料唔多，不過係官方發布 FAQ 上都有透露部份資訊。例如《Back 4 Blood》係一隻 FPS 遊戲，設有基本戰役模式（單人或多人）、多人連線 PVP 模式等等，最另人意外既係 Turtle Rock 講到明唔會推出時下大熱既大逃殺模式，絕對無跟風既意圖，幾好！

另外亦都有提到會係 PS4 / Xbox One / PC 平台上發行，上市時間未定。不過都有機會落埋 Nintendo Switch，因為佢後面寫咗句「More possibilities aren’t out of the question though.」 （更多的可能性並非不可能。）

雖然原開發團隊再出新 Game 令人好興奮，不過唔好忘記佢地對上出果隻遊戲叫做《Evolve》，簡直係唔少機迷既惡夢！今次重新出發，希望佢地汲取之前既失敗經驗，再做一隻可以玩十年都唔厭既遊戲出黎啦！