曾出演大熱遊戲《JUDGE EYES：死神的遺言》以及聲演日版《冰雪奇緣》及《Kingdom Hearts III》「雪寶」一角嘅日本藝人瀧正則（ピエール瀧）早前因為疑似吸食可卡因被捕，呢件事除左為佢幾十年嘅演藝生涯蒙上陰影之外，日本當地唔止將佢所有綜藝活動中止，世嘉仲剛剛發聲明，會將《JUDGE EYES：死神的遺言》數位版、實體版以及所有宣傳海報全線下架作自肅處理。

販売自粛に伴い、『JUDGE EYES：死神の遺言』に関するツイート等は削除いたしました。何卒ご理解のほどよろしくお願いいたします。//t.co/ET4m1CxJdz

— セガ公式アカウント (@SEGA_OFFICIAL) March 13, 2019

唔單止貨物下架，世嘉仲決定將所有有關遊戲嘅 Twitter 發文全部刪除，直至今次吸毒事件告一段落咁話。日本有好強嘅自肅文化，以今次世嘉為例，因為瀧正則疑似觸犯「麻薬取締法」，為左品牌形象以及「唔想為大眾帶來唔愉快嘅體驗」等理由，會將遊戲下架，亦都係意料之內。

日本方面大肆報導是次吸毒事件

瀧正則有關節目活動海報一律快速移除

世嘉亦唔係第一次遇上呢啲事件，例如早前推出 HD 版嘅《人中之龍 4》裡面飾演「谷村正義」一角嘅成宮寬貴，亦都因為涉毒被捕，世嘉亦都改變角色模組以及聲優應對；唔知《JUDGE EYES》黎緊會唔會同《人龍 4》一樣進行模樣改組？

《JUDGE EYES》作為世嘉重頭遊戲作品，今次遇上呢件事相信亦會影響遊戲銷售量，希望事件快啲告一段落！