講起「克魯蘇神話」，大家可能不期然會諗起《Bloodborne 血源詛咒》以及較近期嘅《Call of Cthulhu 克蘇魯的呼喚》，不過除左呢兩隻遊戲以外，其實黎緊 2019 年 3 月 21 日仲有另一隻以克魯蘇神話作為故事背景嘅遊戲《The Sinking City 沉沒之城》推出。

編輯部早前曾經都介紹過呢隻遊戲（詳文按此），《沉》係一隻第三視點解謎遊戲，玩家飾演私家偵探，美國東部麻省架空城市 Oakmont 發生前所未有嘅洪水事件，同時城市入面人心惶惶，怪事頻生，於是你前往一探究竟。

既然講得同「克魯蘇神話」有關，故事當然隱藏住好多超自然事件以及疑似詛咒嘅疑案，玩家飾演嘅主人翁有種特殊能力，就係可以組織線索利用「透視」去了解現場發生過嘅事，不過要利用呢種能力，大前題就係你要解到啲謎題，而呢啲謎題並不容易，所以係一個非常考腦力以及觀察力嘅遊戲。

收集到嘅線索可以返到後台 Menu 進行整理

不過一波未平一波又起，點樣可以將所有案件串連，非常考腦力

喺呢個充滿詛咒嘅城市入面，偶爾會出現魔物向你進行攻擊，雖然遊戲目前顯示嘅攻擊系統有少少簡陋，不過試圖喺一個解謎遊戲裡面加入動作元素亦都係一種好嘅嘗試。

只不過，你會慢慢分唔清眼前所見嘅，係真實，定係只係自己開始出現幻覺……。

遊戲另一個難玩之處就係：幾乎唔會有指標話比你知下一步要做啲咩。遊戲地圖相當大，但係要由邊度開始進行探索，好多時都係要自己摸索。

官方 Frogwares 話咁嘅設定，係想比玩家「設身處地咁去感受男主角身為私家偵探嘅徬徨」，但係正因如此，又再一次令遊戲難度提升。到底要同邊個人講野，到底要去邊度，到底下一步要做咩……聽落非常有自由度，但應該會玩到頭痛（笑）

叫得 Sinking City 當然要經常行水路！

遊戲定於 2019 年 3 月 21 日上市，對應 PS4、PC 以及 XBox One 平台，目前未有繁體中文化消息，不過呢隻遊戲似乎係今個 3 月嘅一隻黑馬，至少我一定會玩！

如果有玩過《Call of Cthulhu 克蘇魯的呼喚》嘅朋友，我亦都好建議你嘗試玩埋呢隻《The Sinking City》，雖然大綱好似，但係玩法同埋系統上面似乎完全唔一樣，難度聽落亦有所增加，不妨挑戰。

最後送上遊戲最新介紹片段：

相關文章：

詭異開放世界偵探遊戲《沉沒之城》 明年一齊進入克魯蘇神話世界
【遊戲感想】個劇本一玩停唔到《Call Of Cthulhu 克蘇魯的呼喚》超陰森懸疑遊戲今日上架