台灣遊戲公司赤燭兩隻中式恐怖遊戲《返校》及《還願》似乎成功帶起「中式風格恐怖遊戲」風潮，雖然《還願》目前涉及兩岸政治問題而無奈地暫時下架處理，不過日本 ORENDA（オレンダ）株式會社亦睇中中式風格嘅恐怖遊戲，所以（修正：多謝網友 Eric 提醒，非開發，只為日版代理）代理左今次介紹呢隻《帋人形（カミニンギョウ）》於 2019 年 2 月 28 日已經於日版 PS Store 上架，定價 2,400円。
《帋人形》嘅「帋」其實係「紙」嘅意思，故事背景係講述玩家同女兒遇上車禍，點知醒返嘅時候，就發現自己身處一間陌生嘅清末大宅入面。大宅一切物事皆受詛咒，一連串恐怖遭遇接近你嘅同時，你到底點樣可以盡快搵返個女、同佢一齊逃離呢間恐怖大屋，就係遊戲重點。
遊戲採第一視點玩法，不過 PS4 呢個版本就唔對應 PSVR，如果唔係個臨場感應該更加恐怖。雖然就咁聽個故事就有少少九唔搭八，例如點解喺隧道撞完車，醒返已經去左間大宅？一定係因為詛咒！恐怖遊戲所有唔合理嘅地方都一定係因為詛咒架嘛！至於點解呢間大屋有詛咒，呢個謎題，就留待各位玩家自己探索了。
以下係遊戲宣傳短片，請注意聲量：
遊戲雜食向，FPS 苦手，全種類 RPG 專攻，重度聲優控。使用機種：Xbox Series X｜PS5｜Nintendo Switch｜Steam Deck。